Lík móður og barns fundust og þrjá­tíu enn saknað eftir að tveir bátar sukku

Samkvæmt upplýsingum frá ítölsku landhelgisgæslunni höfðu bátarnir siglt frá borginni Sfax í Túnis. Fimmtíu og sjö farþegum hefur verið bjargað en talið er að stór hluti þeirra séu farandmenn frá Afríku sunnan Sahara. Samkvæmt ítölskum miðlum var barnið sem fannst látið einungis átján mánaða gamalt.

Eftirlifendum var bjargað fjörutíu kílómetrum suðvestan af Lampedusa, sem er algengur viðkomustaður farandfólks sem siglir frá Norður-Afríku til Evrópu. 

Tuttugu strandaglópum var að auki bjargað eftir að hafa hírst tvo daga á skeri utan eyjunnar eftir að bátur þeirra rak að honum á föstudag. Fresta þurfti björgunaraðgerðum vegna mikilla vinda á svæðinu.

Samkvæmt tölum frá innanríkisráðuneyti Ítalíu hafa 78 þúsund farandmenn numið land á Ítalíu eftir að hafa siglt þangað frá Norður-Afríku, það sem af er ári, tvöfalt meira en á sama tímabili í fyrra. 

Stærstur hluti þeirra siglir frá Túnis, þar sem Evrópusambandið skrifaði í síðasta mánuði undir samning upp á 145 milljarða króna til þess að sporna gegn ólögmætum fólksflutningum milli landanna. Giorgia Meloni, forsætisráðherra Ítalíu, átti stóran hlut í gerð samningsins.