Fleiri fréttir af opnunum í laxveiði

Veiði hófst til að mynda í Laxá í Leirársveit á laugardaginn og þar veiddist einn lax á fyrstu vakt en nokkir laxar sýndu sig svo það er greinilega eitthvað komið í ána. Níu laxar veiddust í Víðidalsá á fyrsta degi og lax sást nokkuð víða. Fyrsti lax sumarsins úr ánni veiddist í Stekkjarfljóti og var það 81 sm hrygna en fjórir laxar veiddust í Harðeyrarstreng sem er einn af skemmtilegri veiðistöðum Víðidalsár. Fitjá gaf síðan þrjá laxa en það er vel þekkt að stofninn sem gengur upp í þessa rómuðu hliðará Víðidalsár er snemmgengur og það er ekki óalgengt á þessum tíma að sjá laxa í Tjarnarfljóti og Laxapolli sem eru ofarlega í ánni.

Við fylgjumst spennt með næstu opnunum en Langá á Mýrum opnar í dag og Gljúfurá, Haffjarðará, Laxá í Aðaldal og fleiri ár opna svo í kjölfarið.