Stórir sjóbirtingar í Ytri Rangá

Það var einu sinni þannig að veiðimenn voru hvattir til að drepa allan sjóbirting sem veiddist, sem þeir og gerðu, en mest af þessum sjóbirting var um 4-6 punda fiskur. Síðustu ár hefur viðhorfið breyst ansi mikið og hafa veiðimenn verið hvattir til að sleppa fiskinum aftur og árangurinn af því er óumdeildur. Það þótti einu sinni sæta tíðindum að fá 80 sm sjóbirting eða stærri í ánni en núna er það eiginlega að verða daglegt brauð.

Við höfum frétt af og séð töluvert af 80+ sm fiskum sem hafa veiðst í vor og þannig var það líka í fyrra. Í gær veiddist svo stærsti sjóbirtingurinn í ánni þetta vorið en það var Hrafn H. Hauksson, vel þekktur veiðimaður og leiðsögumaður, sem veiddi 94 sm fisk á Fossbreiðunni. Ummálið var 56 sm svo það er líklega deginum ljósara að þessi fiskur er eitthvað um eða yfir 10 kíló. Það sést vel á myndinni hvað hann er vel haldinn og í jósi umræðu í gegnum árin hvort Veitt og Sleppt sé að skila einhverjum árangri þá sést það mjög vel á þeim vatnasvæðum þar sem sjóbirtingur er ríkjandi að eftir að veiðimenn fóru að sleppa hefur veiðin aukist og fiskurinn stækkað.