Annie Mist ný inn og Sara fór upp um 225 sæti á heimslistanum í CrossFit

Listinn tekur tillit til árangurs CrossFit fólksins í undan- og aðalkeppni heimsleikanna undanfarin tvö ár. Þetta er samskonar listi og við þekkjum í tennis og golfi.

Íslands á einn karl og fimm konur meðal þeirra fimmtíu efstu á heimslistanum í CrossFit.

Björgvin Karl Guðmundsson er í þriðja sæti listans og heldur þar sæti sínu frá því fyrir fjórðungsúrslitin. Það eru aðeins þeir Justin Medeiros og Patrick Vellner sem eru fyrir ofan hann.

Hjá konunum er Þuríður Erla Helgadóttir í tólfta sætinu, einu sæti á undan Katrínu Tönju Davíðsdóttur. Báðar hækka þær sig um fjögur sæti.

Anníe Mist Þórisdóttir kemur ný inn á lista og er komin upp í 25. sætið. Anníe fékk engin stig fyir allt 2022 tímabilið þar sem hún keppti í liðakeppni í fyrra.

Sólveig Sigurðardóttir fer upp um sjö sæti og situr nú í 31. sæti heimslistans.

Sara Sigmundsdóttir tekur sannkallað risastökk á listanum því hún hoppar upp um 225 sæti og situr nú í fimmtugasta sætinu.

Heimslista kvenna má sjá hér en heimslista karla má sjá hér.