Veiðikonur fjölmenntu á námskeið

Námskeiðið er ætlað veiðifólki sem vil ná betri árangri í sinni laxveiði og þeir Hrafn og Sigþór hafa báðir mikla reynslu af laxveiðum sem og leiðsögumennsku um allt land. Það seldist fljótt upp á námskeiðið og því augljóst að áhuginn er mikill og konur farnar að setja sig í stellingar fyrir næsta sumar. Tuttugu mættu á námskeiðið og halda þær út í komandi tímabil með nokkur ný trix upp í erminni. “Laxveiðin er svo miklu meira en eitt 45 gráðu kast og eitt skref komumst við að” sagði Helga Gísla. Önnur hafði á orði eftir námskeiðið; "Þessi laxveiði er svo mótsagnakennd, þetta er blanda af nördaskap, vísindum, hjátrú, hinu yfirskilningslega, andrenalínfíkn og ósk um kyrrð og ró." Toppið það.

Kvennanefnd SVFR fagnar 10 ára afmæli í haust og á þessum 10 árum hefur það verið markmið nefndarinnar að bjóða konum upp á fræðslu yfir vetrarmánuðina. Afhverju vera með sér kvennanefnd? Aðspurð segir Helga að mikilvægt sé að vera með kvennanefnd, því nálgun kvenna í veiði er oft á tíðum ólík karla og þarf að hlúa að því.

Stjórn kvennanefndar skipa Sæunn Þorkelsdóttir formaður, Helga Gísladóttir, Rún Knútsdóttir og Þóra Sigrún Hjaltadóttir.