Minnir á skák­ein­vígi Fischer­s og Spa­skís: „Haraldur vann Musk með einum fingri“

Atburðarrás síðasta sólarhrings var hin furðulegasta en hún hófst þegar Haraldur spurði Musk hvort hann væri enn starfsmaður Twitter eftir að aðgangi hans að öllum kerfum fyrirtækisins var lokað án skýringa. Musk svaraði færslunni, gerði ítrekað lítið úr Haraldi og gerði fötlun hans að umræðuefni á lágkúrulegan hátt.

Ritdeilurnar sem vöktu heimsathygli tóku óvænta stefnu í gærkvöld þegar þegar Musk bað Harald opinberlega afsökunar.

Karen Kjartansdóttir, ráðgjafi lýsir deilunum sem einu mest spennandi einvígi í áraraðir.

„Af því að ég man sirka eftir Spassky og Fischer. Að minnsta kosti finnst mér maður muna eftir þessu. Þannig þetta var svona stóra einvígið og ekki amalegt að hafa jafn frambærilegan Íslending og Harald í þessari keppni sem vann Musk með einum fingri,“ segir Karen sem er ráðgjafi hjá Langbrók ráðgjöf.

Musk sagði að ástæða útreiðarinnar byggði á misskilningi og að þeir hefðu útkljáð málin í myndsímtali. Haraldur væri meira að segja að íhuga að koma aftur til starfa hjá félaginu. Þá sagði Musk að betra væri að tala saman en að tísta.

„Og það er kannski stóri sannleikurinn sem var dreginn fram í þessu skemmtilega máli, að eigandi Twitter komi fram og segi að það sé betra að tala hreint út við fólk heldur en að vera að tísta.“

Haraldur hefur ekki viljað veita innlendum fjölmiðlum viðtöl vegna málsins en þegar fréttastofa spurði hann hvort hann ætlaði að vera áfram hjá Twitter svaraði hann með þessum hér: 

Karen segir að deilurnar hafi sýnt ógeðfellda hlið á Musk, þessum valdamikla manni.

„Þannig það var óhemju gleðilegt að sjá Musk biðjast afsökunar og hreinlega tapa þessum slag. Maður verður að virða afsökunarbeiðnina, hún er mjög mikilvæg.“

Greint hefur verið frá því að Haraldur sé mögulega í hópi starfsmanna sem erfitt geti reynst að segja upp vegna samkomulags hans við félagið. Karen segir að skaðabótalögmenn Bandaríkjanna hafi því ábyggilega flestir staðið á öndinni í gær og að ákvörðun um afsökunarbeiðni sé klók og byggi eflaust á fjárhagslegum sjónarmiðum.

„Ég held að enginn geti sagt Musk hvað hann eigi að gera. Ég held að Musk hafi dregið þá ályktun að það væri fjárhagslega hagkvæmt að tala við Harald og biðjast afsökunar.“

„Við erum kát þetta er gleðilegur sigur.“