At­kvæða­greiðslan skrum­skæling á lýð­ræði

Ríkissáttasemjari óskaði í gær eftir liðsinni Héraðsdóms til að fá kjörskrá Eflingar afhenta í tengslum við atkvæðagreiðslu um miðlunartillögu hans í kjaradeilu félagsins og Samtaka atvinnulífsins. Efling vill ekki felast á röksemdarfærslu ríkissáttasemjara fyrir miðlunartillögu og neitar að afhenda kjörskrá félagsins sem er grundvöllur þess að atkvæðagreiðslan geti farið fram um tillöguna.

Forysta Eflingar hyggst í dag heimsækja félagsmenn sína á þeim hótelum sem komandi verkfallsaðgerðir eiga að beinast að ti lað hvetja þá til að hafna miðlunartillgöu ríkissáttasemjara. Minnst tuttugu og fimm prósent félagsmanna Eflingar þarf að greiða atkvæði gegn tillögunni til að hún verði felld.

„Jafnvel þótt kjörsókn yrði miklu meiri en þegar aðildarfélög SGS voru að greiða samninga um sinn kjarasamning í desember og jafnvel þótt yfirgnæfandi meirihluti legðist gegn miðlunartillögu ríkissáttasemjara þá teldist hún samt samþykkt. Þannig eru þröskuldarnir. Það er ekki að ástæðulausu að jafnaðarmenn á tíunda áratugnum greiddu atkvæði gegn ákvæðunum um svona miðlunartillögu þegar þau voru lögfest á Alþingi. Þetta er einhvers konar skrumskæling á lýðræði,“ segir Jóhann Páll Jóhannsson þingmaður Samfylkingarinnar.  

„Fyrir stéttarfélag eins og Eflingu, þar sem félagsmenn eru mjög dreifðir og margir erlendis frá. Fólk margt ómeðvitað um réttindi sín þá þýða þessir þröskuldar að það er í rauninni verið að þröngva kjarasamningi upp á fólk.“

Hann bendir á að ríkissáttasemjari sé að boða til þessarrar atvkæðagreiðslu rétt áður en niðurstaða úr kosningu um verkfallsboð liggur fyrir hjá Eflingu. Héraðsdómur Reykjavíkur mun einmitt úrskurða um hvort Efling verði að afhenda ríkissáttasemjara félagatal sitt á mánudag, sama dag og atkvæðagreiðslan um verkfallsboð hjá Eflingu lýkur.

„Þá eru áhrifin í rauninni þau að það er verið að slá verkfallsvopnið úr höndum stéttarfélags með valdboði.“

BHM, BSRB og KÍ, fjölmennustu stéttarfélög opinberra starfsmanna, hafa tekið undir sjónarmið Eflingar og sögðu í yfirlýsingu í gær að það væri alvarleg aðgerð og stórt inngrip að gera verkfallsvopn stéttarfélags að engu.

Jóhann segir aðgerðir ríkissáttasemjara nánast eins og ef Alþingi vær að setja lög á verkfallið.

„En þá eru það þó að minnsta kosti lýðræðislega kjörnir fulltrúar, sem beita þessu valdi. Þá getur almenningur eftir atvikum refsað þeim í næstu kosningum. En nú er þetta gert einhliða af framkvæmdavaldinu og af embættismanni sem er ekki með neitt lýðræðislegt umboð,“ segir Jóhann Páll.

Hann segir þetta mjög hættulegt fordæmi. Endurskoða þurfi lagaákvæði um miðlunartillögur.

„Ég held að þetta ákvæði um svona miðlunartillögu og þessir þátttökuþröskuldar, ég held að þessar reglur séu úr sér gengnar og skrumskæling á lýðræði.“