„Það var logið upp í opið geðið á okkur“

Greint var frá því í vikunni að rannsókn lögreglu á hendur Skúla, sem grunaður er um að hafa sett sjúklinga sína á tilefnislausar lífslokameðferðir, væri á lokametrunum. Hann er grunaður um að bera ábyrgð á dauðsföllum sex sjúklinga hans á árunum 2018-2020.

Þar á meðal var Dana Kristín Jóhannsdóttir sem var 73 ára þegar hún lést, ellefu vikum eftir að hún var lögð inn á Heilbrigðisstofnun Suðurnesja í hvíldarinnlögn. Fjölskylda hennar hefur stigið fram opinberlega og sett fram harða gagnrýni á Skúla Tómas og Heilbrigðisstofnun Suðurnesja (HSS) vegna málsins. 

Í gær var greint frá því að Skúli Tómas væri aftur kominn til starfa á Landspítalanum.Hann var sendur í leyfi frá spítalanum í maí á síðasta ári. Skúli óskaði sjálfur eftir því að fara í leyfi, en er nú snúinn aftur. Hann starfar nú á bráðadagdeild spítalans í verkefnum og teymisskipulagi.

Sætta sig ekki við að Skúli snúi aftur

Þetta ætlar fjölskylda Dönu ekki að sætta sig við, eins og glögglega kom fram í viðtali við Begga Dan Gunnarsson, son Dönu, í viðtali í Bítinu á Bylgjunni í morgun.

„Þetta er vanvirðing við okkur, við ætlum ekki að sætta okkur við þetta, ég og mín fjölskylda. Þetta er vanvirðing við fólkið sem þarf að vinna með honum og þetta er vanvirðing við fólkið sem þarf að leita sér aðstoðar á sjúkrahúsinu,“ segir Beggi.

Þar fór hann yfir málið frá sjónarhorni fjölskyldunnar og lýsti meðal annars hvernig komið hafi verið fram við móður hans á HSS. Þar var hún send í hvíldarinnlögn en var í raun sett í lífslokameðferð. Sagði Beggi að hún hafi falið í sér mikla lyfjagjöf.

„Morfíni og slævandi lyfjum. Þannig að hún bara út úr heiminum, í rauninni. Fékk ekkert um það ráðið. Þegar hún reynir að mótmæla þessari lyfjagjöf settu þeir morfín-plástra á bakið á henni þannig að hún náði þeim ekki af. Þetta var bara agaleg upplifun,“ sagði Beggi.

Sagði hann að fjölskyldan hafi gert ítrekaðar athugasemdir við meðferðina.

„Bara um leið og við sáum að hún var út úr heiminum af þessum lyfjum. Það var logið upp í opið geðið á okkur. Að hún væri deyjandi, sem hún var ekki. Hún er á lífslokameðferð í sex vikur,“ sagði Beggi.

Svört skýrsla landlæknis

Eftir andlát Dönu kvartaði fjölskyldan til embættis landlæknis. Sú kvörtun skilaði sér í svartri skýrslu embættisins. Þar voru alvarlegar athugasemdir gerðar við meðferð Dönu.

„Þegar við gerum þetta opinbert og eftir að skýrsla Landlæknis berst okkur þá förum við að fá skilaboð frá öðrum sem hafa upplifaða svipaða hluti með sína ástvini.“

Frá sama lækni?

„Já, frá sama lækni.“

Á sama sjúkrahúsi?

„Já, Heilbrigðisstofnun Suðurnesja. Þannig að þetta er fljótt að vinda upp á sig.“

Sem fyrr segir er Skúli Tómas grunaður í sex málum.

Beggi  segir að fjölskyldan upplifi það sem mikla óvirðingu að Skúli Tómas skuli vera starfandi á Landspítalanum.

„Það finnst mér gjörsamlega fyrir neðan allar hellur. Okkur finnst það sé verið að sýna okkur mikla óvirðingu, okkur aðstandendum. Ekki bara mömmu, heldur allra þessara meintu fórnarlamba. Í hvert skipti sem að ég kem fram í fjölmiðlum eða skrifa pistil sem vekur athygli þá fæ ég skilaboð. Ég hef fengið slatta af skilaboðum frá fólki sem er að vinna á spítalanum. Sem er að vinna með Skúla á Landspítalanum. Þeim finnst mjög óþægilegt að vinna með honum. En þau þora ekki fyrir sitt litla líf að minnast á það við sína yfirmenn að ótta við að missa vinnuna,“ segir Beggi.

Sendi Skúla skilaboð í gegnum útvarpið

Að sögn Begga er rannsókn lögreglu á málunum sem tengjast Skúla lokið og bíða nú ákvörðunar um hvort gefin verði út ákæra. Biðlaði hann til Skúla um að halda sig til hlés á meðan málið væri til meðferðar.

„Mig langar þá bara að koma þeim skilaboðum til Skúla að hann ætti að sýna smá sómakennd og vera heima hjá sér á meðan niðurstaða fæst í þessi mál. Það er óásættanlegt að hann sé að vafra á göngum spítalans á þessum tímapunkti.“