Þvertekur fyrir mismunun og býður þingmanni Pírata að mæta

Í færslunni sem birtist á Facebook síðu Fjölskylduhjálpar Íslands í Reykjanesbæ í gær sagði að byrjað yrði á Íslendingum sem óskað höfðu eftir jólaaðstoð og að erlendir ríkisborgarar með íslenskar kennitölur yrðu næstir.

Í færslu sem birtist nú í morgun var beðist afsökunar á fyrri færslunni og sagt að allir væru jafnir. Úthlutanir færu fram á tveimur dögum þar sem margir skjólstæðingar þyrftu að hafa túlka með sér. Báðum færslum hefur nú verið eytt.

Ásgerður Jóna Flosadóttir, formaður Fjölskylduhjálpar Íslands, vildi ekki veita fréttastofu viðtal vegna málsins. Á mbl.is í dag er haft eftir henni að sjálfboðaliði hafi sett færsluna inn og að sá hafi verið látinn fara. Þetta vildi Ásgerður Jóna ekki staðfesta opinberlega í samtali við fréttastofu.

Þvertekur fyrir mismunun og segir um misskilning að ræða

Kristófer Gajowski, sjálfboðaliði hjá Fjölskylduhjálp Íslands sem hefur tekið þátt í úthlutunum í Reykjavík og í Reykjanesbæ í um áratug, segir málið byggja á misskilning. Það hafi verið þannig að allir sem væru með íslenska kennitölu, óháð þjóðerni, væru í annari röð en þeir sem ekki væru með kennitölu, enda þurfi að skrá þá.

Hann þvertekur fyrir það að fólki sé mismunað.

„Eins og til dæmis ef þú ert frá Póllandi, frá Afríku, frá Venesúela eða Úkraínu, að þú fengir ekki neitt. Nei. Það eru alltaf allir hjartanlega velkomnir sem að koma til Fjölskylduhjálpar Íslands,“ segir Kristófer.

Þannig það stóð aldrei til að Íslendingar myndu fá og aðrir myndu sitja eftir?

„Það er ekki þannig,“ segir hann enn fremur. „Við erum aldrei að undirbúa íslenska og útlenska hópa. Við erum bara að gefa öllum sem koma hingað og fara.“

Hann bætir við að færslan hafi verið misskilin af þeim sem hana gagnrýndu, einhverjum sem hefðu ef til vill betri tök á íslensku máli en sá sem ritaði færsluna.

Þingmaður Pírata gæti mætt og aðstoðað í fríinu

Björn Leví Gunnarsson, þingmaður Pírata, var meðal þeirra sem gagnrýndu færsluna og vísaði til 65. greinar stjórnarskrárinnar, sem kveður á um að allir skuli vera jafnir fyrir lögum. Kristófer segir það hárrétt að allir skulu vera jafnir. 

„En ég held að hann njóti tækifæra sem allir vita um. Ég vil spyrja svona alþingismann, sem að lifir á okkar peningum, allra skattgreiðanda á Íslandi, hvenær var hann í síðasta skipti hjá Fjölskylduhjálp Íslands hér í Reykjavík eða í Keflavík,“ spyr Kristófer og bætir við að Björn Leví gæti komið og aðstoðað meðan Alþingi er í jólafríi.

Sjálfur fer Kristófer einnig fyrir samtökunum Support Ukraine Iceland og bendir á að þau líkt og Fjölskylduhjálp Íslands fái litla sem enga aðstoð frá yfirvöldum, þar á meðal í sveitarfélögum á borð við Reykjavíkurborg.

„Hversu mikið höfum við fengið frá þeim? Þau eru endalaust að bjóða fólki til Íslands, þau lofa en standa aldrei við það sem þau hafa lofað,“ segir hann.

Áður borið á gagnrýni í garð Fjölskylduhjálpar

Þetta er ekki í fyrsta skipti sem Fjölskylduhjálp Íslands hefur verið sökuð um mismunun en fyrir rúmum áratug greindi Fréttablaðið frá því að fólki hafi verið bent í tvær biðraðir í vikulegri matarúthlutun sinni. Í aðra röðina hafi útlendingar farið en í hina Íslendingar, sem gengu fyrir.

Gaf Ásgerður Jóna þær skýringar þá að útlendingarnir mættu snemma í biðröð á meðan íslenskt barnafólk og eldri borgarar komu seinna og gáfust upp á biðinni. 

Þá lýsti fyrrverandi sjálfboðaliði og skjólstæðingur fyrir tveimur árum reynslu sinni af mismunun á grundvelli trúarbragða við úthlutun matvæla. Þá sögðust konur af erlendum uppruna hafa upplifað mismunun.

Ásgerður Jóna svaraði ásökunum í yfirlýsingu á vef samtakanna. Þar sagði hún að 58 prósent skjólstæðinga væru með erlent ríkisfang og að gagnrýni byggði á staðreyndavillum. Fjölmenningarráð Reykjavíkurborgar óskaði við það tilefni eftir því að  Fjölskylduhjálp Íslands skilaði greinargerð um hvernig tryggt væri að þar væri unnið gegn mismunun við úthlutun til skjólstæðinga. 

Sabine Leskopf, formaður ráðsins, staðfestir við fréttastofu í dag að slíkri greinargerð hafi ekki verið skilað.