Kaspíaselir drápust í þúsundatali

Í upphafi töluðu yfirvöld um að 700 dýr hefðu fundist á ströndinni en umhverfisráðuneyti Rússlands hefur nú hækkað töluna í 2500 dýr. Enn er óljóst hvað olli dauða selanna en líklegt er þó talið að um náttúrulegar orsakir sé að ræða.

Kaspíaselur er á meðal minnstu selategunda heims og er tegundin talin í útrýmingarhættu. Þó er afar umdeilt hversu mörg dýr eru til í heiminum, sumstaðar er talað um allt að 300 þúsund dýr en aðrar heimildir segja að talan sé aðeins um sjötíu þúsund.

Slíkur fjöldadauði sela við Kaspíahaf er ekki einsdæmi, á þessu ári hafa þrír svipaðir atburðir verið tilkynntir í Kazakstan, sem einnig á langa strandlengju við Kaspíahaf.