Samið um knatthús Hauka en Sam­fylkingin hringir við­varana­bjöllum

Haukar hafa lengi kallað eftir knatthúsi til að geta iðkað fótbolta innandyra yfir vetrartímann. Rósa Guðbjartsdóttir bæjarstjóri í Hafnarfirði tók fyrstu skóflustunguna að knatthúsi í apríl í fyrra. Þá héldu Haukar upp á níutíu ára afmæli félagsins.

Til stendur að reisa húsið á núverandi grassvæði Hauka. Kostnaður er áætlaður 3,4 milljarðar en að Hafnarfjarðarbær fái land frá Haukum á móti sem metið er á 1,3 milljarða. Kostnaður bæjarins verði því um 2,1 milljarður króna.

Framsókn og Sjálfstæðisflokkurinn mynda meirihluta í bænum. Meirihlutinn lagði fram tillögu á fundinum í morgun um að bæjarráð samþykkti að gengið yrði til samninga við lægstbjóðanda og vísaði málinu til bæjarstjórnar. Bæjarráðsmenn Samfylkingarinnar lögðu fram tillögu um að fresta því að staðfesta tilboðið. Endurskoða ætti verkefnið innan tveggja mánaða, minnka umfang og leggja grunn að mun ódýrara og einfaldara upphituðu húsi.

Tillagan var felld af meirihlutanum.

„Það er ljóst að heildarkostnaður við knatthúsið mun ekki verða undir 4 milljörðum króna, þegar upp er staðið. Fyrirliggjandi tilboð lægstbjóðanda, verktakans, er 10% yfir kostnaðaráætlun bæjarins. Á sama tíma liggja upplýsingar fyrirliggjandi liggja um það, að unnt er að reisa gott upphitað hús fyrir knattspyrnufólk sem þjónar sama tilgangi fyrir helmingi lægri upphæð, eða um 2 milljarða króna,“ sagði í bókun Samfylkingarinnar.

Niðurstaðan væri vonbrigði.

„Fyrir liggur einnig álit Skipulagsstofnunar, þar sem gerðar eru alvarlegar athugasemdir við málið allt. Þar er kallað eftir minna hús hvað varðar hæð og breidd, sem kæmi mjög til móts við athugasemdir sem komu fram í umhverfismatsferli. Minna hús að ummáli myndi í öllum tilvikum nýtast til æfinga og keppni allra aldurshópa,“ segir í bókun flokksins.

Meirihluti Sjálfstæðisflokks og Framsóknarflokks lýsti furðu með breytti afstöðu Samfylkingarinnar í málinu frá því á bæjarstjórnarfundi í júní. Þá var samþykkt samhljóða að farið yrði í útboð á því fyrrnefndu húsi. Stærð og umfang hússins auk kostnaðaráætlunar hafi legið skýrt fyrir.

„Tillaga Samfylkingarinnar sem nú er lögð fram um endurmat og endurhönnun mannvirkisins með það í huga að ná niður kostnaði um helming er því einungis lögð fram til að leggja stein í götu uppbyggingar á Ásvöllum, tefja málið og koma því öllu á byrjunarreit. Ljóst er að hér er verið að samþykkja framkvæmd að upphæð 3,4 milljarða króna og knattspyrnufélagið Haukar afsalaði sér hluta yfirráðasvæði íþróttafélagsins undir íbúðabyggð til stuðnings verkefninu. Sú lóðasala, sem annars hefði ekki komið til, veitti 1,3 milljarða í verkefnið. Beinn hlutur bæjarfélagsins verður því rúmir 2 milljarðar króna sem dreifist á 2-3 ár.“