Reykja­vík Design leitar að sam­starfs­aðilum

„Við bjóðum upp á fjölbreytt úrval af smávöru fyrir heimilið og gjafavöru og eigum mikið úrval af ljósum og húsgögnum. Nýjasta viðbótin eru frábærar barnavörur frá m.a. Bloomingville Mini, Little Dutch og Mindful og co,“ segir Viktoría, verslunarstjóri Reykjavík Design, en nýir eigendur tóku við Lífsstílsversluninni á síðasta ári.

Með þeim fylgdi stærra og bjartara húsnæði að Síðumúla 21, ný vefverslun fór í loftið og vörúrvalið hefur stóraukist og fer vaxandi. Viktoría segir samkeppnishæft verð og góða þjónustu lykiláherslu Reykjavík Design.

„Við vöndum okkur gríðarlega við vöruúrvalið og veljum allar vörurnar okkar með fegurð og notagildi í huga. Netverslunin hefur einnig verið að færast í aukana og eru allar okkar vörur í boði þar. Við bjóðum upp á alla helstu greiðslumáta, svo sem Netgríó, Aur, Pei, Apple Pay og Aukakrónur. Einnig bjóðum við upp á nokkra kosti í heimsendingu um land allt.“

Spennandi rými fyrir ólíka viðburði

Nýja húsnæðið hefur frábært viðburða- og sýningarrými sem býður upp á bæði standandi og sitjandi viðburði fyrir hátt í 30 manns. Rýmið hefur nýst vel hingað til en þar hafa ýmist myndlistarsýningar, smakkviðburðir og vörukynningar farið fram. Rýmið hentar einnig vel fyrir bókaútgáfu-viðburði.

Einnig býðst hópum að bóka viðburðarýmið í lokaða viðburði utan opnunartíma, hafa búðina útaf fyrir sig í viðburði, eða til þess versla í friði fyrir brúðkaupsveislur eða stórafmæli.

„Okkur finnst frábært þegar fólk hefur samband varðandi ýmsar hugmyndir af viðburðum sem þau langar að hafa. Við erum alltaf til í að koma til móts við fólk og vera með,“ segir Viktoría.

Aðstoða við að koma hönnun í framleiðslu og sölu

„Við erum sífellt með augun opin fyrir nýjungum og fallegri hönnun og ávallt til í eiga samtal við hönnuði og vöruframleiðendur um samstarf. Við leggjum mikið upp úr því að koma íslenskri hönnun á framfæri,“ segir Viktoría.

„Ég hugsa Reykjavík Design ekki einungis sem verslun heldur frekar eins og lítið samfélag sem sameinar okkur, hönnuðina og viðskiptavini okkar. Það er afskaplega spennandi þegar nýr hönnuður slæst í hópinn með okkur og við skoðum alla möguleikana sem við höfum. Til að mynda bjuggum við til krumma-hurðaskilti með Smára frá HER design. Það var mjög spennandi verkefni sem kom rosalega vel út og heldur áfram að þróast. Þetta verkefni gekk svo vel að við erum að vinna í nýrri ljósalínu saman núna sem kemur á markaðinn fyrir jólin. Við erum opin fyrir þess háttar samstarfi. Við hvetjum hönnuði, nýja sem og reynda, til þess að hafa samband við okkur varðandi samstarf.

Við erum spennt fyrir samstarfi við vöruhönnuði sem vantar aðstoð við að koma sinni hönnun í framleiðslu og sölu. Við getum komið að fjármögnun á vöruframleiðslu, aðstoðað með sölu og markaðssetningu og margt fleira. Við hvetjum eindregið vöruhönnuði til að leita til okkar með sína hönnun og ræða samstarfsfleti.“

Vilja samstarf við aðrar hönnunarverslanir

Flutningskostnaður til Íslands er almennt frekar hár og hefur hækkað töluvert upp á síðkastið. Einnig þarf að borga skatta, leigu og fleira og hækkandi verðbólgu fylgja áskoranir. Einnig eru töluvert margar hönnunarverslanir á Íslandi, bæði hefðbundnar verslanir sem og netverslanir. Samkeppni er því mikil og erfitt getur reynst fyrir minni aðila að keppa við þá stærri. Rekstrarumhverfið fyrir minni hönnunarverslanir getur verið ansi strembið og arðsemi almennt ekki góð. Okkar svar við þessu er einfaldlega aukið samstarf,“ útskýrir Viktoría en Reykjavík Design hefur átt gott samstarf við innlenda hönnuði og framleiðendur.

„Það er alltaf hægt að gera betur. Okkur langar að byggja upp stærri og hagkvæmari einingu og leitum því að innlendum hönnunarverslunum sem væru til í að sameinast okkur eða deila með okkur plássi eða jafnvel lager. Af þessu gæti hlotist töluvert hagræði fyrir báða aðila og meira svigrúm til þess að auka vöruúrval og geta boðið betra verð og þjónustu og stutt við framtíðarvöxt. Þannig getum við lagt okkar að mörkum til þess að styrkja verslun hönnunarvara á Íslandi og stutt betur við innlenda hönnun og framleiðslu.“