Sagðist líka skilja áhyggjur Modi og vill binda skjótan enda á stríðið

Leiðtogarnir funduðu í dag og gagnrýndi Modi innrásina í Úkraínu og sagði að nú væri „ekki tími fyrir stríð“.

„Ég veit af afstöðu þinni af átökunum í Úkraínu, þínum áhyggjum,“ sagði Pútín samkvæmt AFP fréttaveitunni. „Við munum gera okkar besta til að enda þetta eins fljótt og auðið er.“

Þá sakaði hann Úkraínumenn um að vilja ekki eiga í viðræðum við Rússa. Í fyrstu fóru viðræður fram milli Úkraínumanna og Rússa en þær voru stöðvaðar eftir að ódæði rússneskra hermanna í Bucha og öðrum byggðum norður af Kænugarði, höfuðborg Úkraínu, urðu ljós.

Sjá einnig: Hleruðu rússneska hermenn ræða morð á íbúum Bucha

Pútín fundaði í gær með Xi Jinping, forseta Kína, og þá sagðist hann einni hafa skilning á áhyggjum Xi af innrásinni. Pútín er staddur í Samarkand í Úsbekistan á leiðtogafundi Öryggisbandalags Sjanghæ eða SCO.

Sjá einnig: Sagðist skilja áhyggjur Xi af innrásinni í Úkraínu

Rússar gerðu innrás í Úkraínu þann 24. febrúar. Rússar hafa gefið fjölmargar ástæður fyrir innrásinni sem snúast margar um það að Vesturlönd séu að nota Úkraínu gegn Rússlandi. Aðrar uppgefnar ástæður hafa verið á þann veg að Rússar vilji vernda íbúa Úkraínu gegn nasistum sem stjórni landinu.

Heima fyrir hafa skilaboðin frá yfirvöldum í Rússlandi til þjóðarinnar oft verið á þá leið að úkraínska þjóðin eigi ekki tilvistarrétt. Úkraína sé Rússland. 

Innrásin ber þó merki landvinningastríðs og hafa tugir þúsunda dáið vegna hennar. Rússneskir hermenn standa frammi fyrir fjölmörgum trúverðugum ásökunum um stríðsglæpi og fjölmörg ódæði í Úkraínu. Fjölmörg byggðarlög af ýmsum stærðargráðum hafa svo gott sem verið jöfnuð við jörðu í austurhluta Úkraínu.

Sjá einnig: Segja Pútín hafa hafnað málamiðlun og stefnt ótrauðan á innlimun

Fyrst reyndu Rússar að taka Kænugarð, höfuðborg Úkraínu, í skyndiárás. Það gekk ekki eftir og eftir mikið mannfall hörfuðu Rússar með því markmiði að stytta birgðalínur sínar og einbeita sér að austur- og suðurhluta Úkraínu.

Sjá einnig: Stjaksettu höfuð úkraínsks hermanns

Eftir hægan og kostnaðarsaman árangur í austri, og lítinn sem engan í suðri, undanfarna mánuði, hafa Rússar flúið frá Kharkív og virðast í tiltölulega slæmri stöðu. Samhliða versnandi stöðu Rússlands hafa ráðamenn í Moskvu og málpípur Kreml ítrekað hótað notkun kjarnorkuvopna gegn Úkraínu og Vesturlöndum.

Þá hefur innrásin haft slæm áhrif á hagkerfi heimsins og orku- og matvælamarkað.

Sjá einnig: Rússar hafa rænt allt að 1,6 milljónum Úkraínumanna og flutt til Rússlands

Vilja vopn til að vinna sem fyrst

Úkraínumenn, sem hafa notið vopnasendinga og annars konar aðstoðar frá ýmsum Vesturlöndum, hafa frá upphafi innrásarinnar beðið um fleiri og betri vopn en þeir hafa fengið. Eftir vel heppnaða sókn þeirra gegn Rússum í Kharkív segja Úkraínumenn að öllum ætti að vera ljóst að besta leiðin til að binda enda á stríðið sé að hjálpa Úkraínumönnum að sigra Rússa sem fyrst.

Önnur fljótleg leið væri að Pútín skipaði her sínum að hörfa frá Úkraínu en hann þykir ekki líklegur til þess.