Zendaya, Jung-jae, Lizzo og Keaton sigursæl í gær

Bjarki Sigurðsson skrifar 13. september 2022 06:49

Lee Jung-jae og Hwang Dong-hyuk fengu báðir Emmy-verðlaun í gær fyrir þættina Squid Game. Getty/Frazer Harrison

Í nótt fór Emmy-verðlaunahátíðin fram í 74. skiptið. Það var grínistinn Kenan Thompson sem sá um að kynna hátíðina sem var haldin í Microsoft-leikhúsinu í Los Angeles.

Dramaþátturinn Succession fékk flestar tilnefningar í ár eða 25 talsins. Þættirnir Ted Lasso og The White Lotus fengu 20 tilnefningar hvor. Þá voru tveir Íslendingar tilnefndir, þeir Daði Einarsson og Matthías Bjarnason en þeir unnu saman að tæknibrellum í þáttunum The WItcher. Þeir hlutu ekki verðlaun í nótt en teymið sem gerði tæknibrellur fyrir Boba Fett vann.

Þrátt fyrir 25 tilnefningar hlaut Succession einungis fjögur verðlaun í nótt. Sömuleiðis fékk Ted Lasso einungis fjórar styttur. Það var The White Lotus sem hlaut flest verðlaun í gær, tíu talsins. Næst komu þættirnir Euphoria og Squid Game með sex verðlaun.

Jason Sudeikis vann verðlaunin fyrir besta leik í grínþáttaröð.Getty/Frazer Harrison

Aðalleikari Squid Game, Lee Jung-jae, varð í gærkvöldi fyrsti asíski leikarinn til þess að vinna Emmy-verðlaun fyrir besta leik í aðalhlutverki í dramaþáttaröð. Þá vann leikstjóri þáttanna, Hwang Dong-hyuk, verðlaun fyrir bestu leikstjórn í dramaþáttaröð, einnig fyrstur asískra.

Zendaya vann í annað skiptið Emmy-verðlaun fyrir bestu leikkonuna í aðalhlutverki í dramaþáttaröð fyrir þættina Euphoria. Hún vann einnig árið 2020 fyrir fyrstu þáttaröð Euphoria.

Zendaya var að vinna verðlaunin í annað sinn.Getty/David Livingston

Michael Keaton var í ár tilnefndur í fyrsta sinn í átján ár og hlaut hann verðlaun fyrir besta leik í „limited“ þáttaröð en hann lék aðalhlutverk þáttanna Dopesick á Disney+.

Lizzo var í fyrsta skiptið tilnefnd til Emmy-verðlauna og vann hún verðlaun fyrir bestu raunveruleikakeppnisþætti fyrir þættina Lizzo‘s Watch Out for the Big Grrrls.