Algengustu mýturnar í leiðinlegri vinnu

Leiðinleg vinna. Leiðinleg verkefni.  Langar að vera annars staðar.  Langar að vera að gera eitthvað annað.

Í verstu tilfellunum finnst fólki jafnvel vinnufélagarnir hundleiðinlegir.

Þegar að líðanin er þessi eru tvær mýtur sem eru mjög ráðandi í huganum og þær eru:

#1. Það þurfa allir að gera eitthvað sem er leiðinlegt. Lífið er ekki bara skemmtilegt.

#2. Ég verð að vera hér til að framfleyta mér.

Rannsóknir hafa hins vegar sýnt og sannað til fjölda ára að þetta eru mýtur. Því fyrst og fremst er það hugarfarið okkar sem skiptir máli en ekki vinnan sjálf eða launin.

Til dæmis hafa margar rannsóknir sýnt að jákvætt hugarfar bætir bæði andlega og líkamlega heilsu.

Og rannsóknir hafa líka sýnt að peningar og hamingja er ekkert það sama.

Reyndar er vert að benda hér á að peningaáhyggjur eru ekki það sama og leiðindi. Ef þér finnst þú vera í vinnu eingöngu vegna kvíða yfir peningamálunum er því gott að gúggla og finna leiðir til þess að sporna við þessum kvíða. Því það er alltaf hægt að láta sér líða aðeins betur, sama hver staðan er.

Ef leiðindi eru hins vegar rót vandans eru hér nokkur einföld ráð sem gætu komið þér af stað í jákvæðar breytingar:

#1. Hvað ert þú að gera í stöðunni?

Einfalt ráð er til dæmis að taka ákvörðun um að brosa meira á daginn því það er alveg ótrúlegt hvað meira bros getur gert fyrir okkur og reyndar alla aðra í kringum okkur.

#2. Hvað viltu gera í stöðunni?

Mögulega ertu með einhverja óljósa hugmynd að ef þú værir að vinna annars staðar væri lífið mun skemmtilegra. Málið er að það þarf hins vegar bara alls ekkert að vera svo. Sérstaklega ef jákvæða viðhorfið þitt á erfitt uppdráttar.

#3. Hvert stefnir þú?

Við þurfum alltaf að byrja einhvers staðar og ef staðan er þannig að þú veist ekki hvað þig langar til að gera eða vera, er um að gera að byrja á því verkefni strax. Hverjir eru draumarnir og hvað langar þig mest að gera eða vera?

Mögulega gæti það truflað marga að sjálfsmatið er of lágt og fyrir vikið hefur fólk ekki trú á að því gæti vegnað betur eða að draumarnir rætist. Ef svo er, gæti verið gott að gúggla og reyna að finna leiðir og lausnir til að efla sjálfsmatið. Sem gæti opnað margar dyr og mikla gleði, þótt þú værir áfram í sömu vinnu.