Undirbúningur fyrir hressilega góðan mánudag

Því hvort sem við erum að mæta aftur eftir frí eða bara eftir góða helgi verður það að segjast að mánudagarnir geta oft verið nokkuð erfiðir fyrir okkur.

Að vakna á mánudagsmorgni, vera eldhress til að mæta til vinnu og bretta þar upp ermar. 

Úff, oft erfitt!

En þótt það stefni í fjöruga helgi og jafnvel gott ferðalag, er alveg hægt að peppa okkur upp í góða mánudagsmorgna með smá undirbúning.

Hérna eru nokkrar tillögur:

#1: Helgin

Þótt það sé líklegt að svefnrútínan verði eitthvað aðeins öðruvísi um helgina og við mögulega að sofa út, er ágætt að hafa í huga að snúa sólahringnum þó ekki við og helst að sofa ekki of lengi fram eftir á morgnana.

Sérstaklega á sunnudag.

#2: Sunnudagurinn

Mælt er með að borða kvöldmatinn þremur til fjórum klukkustundum fyrir svefninn og helst ekkert eftir það.

Þetta ráð kemur megrun reyndar ekkert við heldur er hér verið að vitna í næringafræðing í umfjöllun Bodyshot Performance sem segir að eitt af því sem er best fyrir svefninn er að líkaminn fái hlé í nokkrar klukkustundir áður en farið er að sofa, því þá gengur líkamanum betur að vinna úr því sem hann er að vinna úr yfir nóttina.

Þá er gott að muna að á hverri nóttu þurfum við að sofa í sjö til átta klukkustundir þannig að líkami og hugur nái góðri hvíld og dagsformið okkar verði sem best daginn eftir.

Það hjálpar ótrúlega mikið til við vinnu og alla almenna velgengni í lífinu að ná alltaf góðum nætursvefni.

#3:  Mánudagsmorguninn

Þegar að þú vaknar á mánudagsmorguninn er gott að koma líkamanum strax af stað í einhverja hreyfingu.

Já, við ætlum ekki að fara að snúsa!

Að vakna, setjast strax upp og teygja úr sér, standa upp og fara fram er góð leið til að koma okkur strax í góðan gír fyrir daginn.

Þó ekki þannig að við séum að hreyfa okkur í einhverju hasti. 

Alls ekki. Frekar að gera þetta að notalegri stund. Koma blóðrásinni af stað með því að setjast upp, nudda stýrurnar úr augunum, hreyfa svolítið útlimina eða teygja úr okkur. Jafnvel gera smá morgunæfingar.

#4: Kærleikur, ást eða hrós

Sumum kann að þykja þetta væmið en staðreyndin er bara sú að þetta snilldarráð virkar mjög vel til að búa okkur undir góðan dag. Jafnvel dásamlegan.

Þetta ráð gengur út á að eitt af fyrstu verkefnunum okkar á morgnana felst í að sýna kærleik, ást eða gefa hrós.

Við getum til dæmis smellt góðum kossi á makann okkar og börn.

Brosað til okkar í speglinum.

Hrósað einhverjum í fjölskyldunni. Jafnvel með hrósi sem við vorum búin að ákveða kvöldinu áður.

Því allt ofangreint gefur okkur frábæra jákvæða orku og fátt virkar betur en einmitt það til að tryggja góðan dag framundan.

#4: Gardínurnar

Annað sem skiptir miklu máli á morgnana er dagsbirtan . Yfir sumartímann er reyndar bjart allan sólahringinn en margir sofa með myrkvunargluggatjöld inni hjá sér og það er um að gera að draga þau frá sem fyrst eftir að þú vaknar.

Því dagsbirtan hjálpar okkur að vakna.

#5: Geggjaða stundin fyrir þig þessa vikuna

Eitt af því sem gerir okkur svolítið vélræn á morgnana er að við erum að sinna morgunverkum á eins stuttum tíma og við getum og flest gengur út á að ná til vinnu á réttum tíma.

Við erum líka vélræn því við vitum að þegar að við mætum til vinnu, bíða okkur fyrirfram ákveðin verkefni og hlutverk sem við þurfum að sinna.

En til að hrista af okkur þetta vélræna slen og finna betur orkuna sem við viljum vera uppfull af, er gott að hugsa um það á hverjum morgni hvað okkur hlakkar mest til að gera í þessari viku.

Ekki í vinnunni og ekki fyrir neinn annan en okkur sjálf.

Þetta gæti verið golfið sem við ætlum að spila, göngutúrinn, kaffihúsahittingurinn, hádegismaturinn sem við vorum búin að bóka með vini eða vinkonu, hugleiðslan sem við ætlum að gefa okkur tíma fyrir í dag eða hvað annað sem er.

Á ensku er oft talað um þessa stund sem „me time“ en það sem einkennir þessar stundir er að okkur hlakkar alltaf til þeirra og því er það alltaf þess virði að skipuleggja svona stundir fyrir hverja viku.

Það besta við þessa mánudagsþjálfun er að oftar en ekki, smitar hún út frá sér og áður en þú veist af ertu farinn að upplifa hvern morgun sem auðveldari og skemmtilegri og fyrir vikið verður það ósjálfrátt að bæði orkan og jákvæðnin mæta með þér í vinnuna alla daga.