Gengst við röngum fullyrðingum en segir viðsnúning núverandi meirihluta með ólíkindum

Nýr meirihluti í Hveragerði sem samanstendur af Framsóknarflokki og Okkar Hveragerði sendi í gær út fréttatilkynningu þar sem hann segir fyrrum meirihluta Sjálfstæðisflokks aldrei hafa pantað nýjan Dúk fyrir uppblásið íþróttahús í bænum.

„Óljóst er hvers vegna þáverandi bæjarstjóri ákvað að fylgja ekki eftir ákvörðun þáverandi meirihluta Sjálfstæðisflokksins um að panta nýjan dúk frá Duol. Þó er ljóst að upplýsingar sem koma fram í frétt frá fyrrum bæjarstjóra á vef bæjarins frá 28. apríl sl. um að samningur hafi verið undirritaður um kaup á nýjum dúk frá Duol er ekki rétt þar sem enginn samningur virðist liggja fyrir, heldur aðeins tilboð sem hefur einungis verið undirritað af hálfu Hveragerðisbæjar, en ekki Duol,“ segir í tilkynningunni.

Í tilkynningunni kemur jafnframt fram að pöntun á efni í dúkinn sé í byrjunarfasa en vegna stöðu á heimsmarkaði geti það tekið tíma. Því er ekki víst hvort hægt sé að koma húsinu upp fyrir veturinn.

Gengst við því að enginn samningur sé til

Aldís Hafsteinsdóttir, fyrrverandi bæjarstjóri Hveragerðis skrifaði tilkynningu á síðu bæjarins í apríl þar sem fram kemur að samningur hafi verið undirritaður um kaup á dúknum, en núverandi meirihluti segir engan samning liggja fyrir.

„Já þetta eru mistök hjá mér og ég gengst fúslega við þeim. Við undirritum þarna tilboð. Í kjölfarið á samþykktu tilboði þarf að fara í samningagerðina og hún var eftir. Það liggur alveg fyrir að tilboð í dúkinn var lagt fyrir bæjarstjórn, það var undirritað í kjölfarið. Eins og allir þekkja sem þekkja til samninga þá er það þannig að um leið og við erum búin að undirrita tilboð og senda erlendis þá er samningur, þá er orðið gilt tilboð,“ segir Aldís. 

„Aftur á móti vorum við ekki búin að ganga frá samningi enda það sem gerist hér í Hveragerði er að hér logar bæjarfélagið stafna á milli og það er núverandi meirihluti sem stóð fyrir þeirri umræðu, með mjög mikilli óvæginni gagnrýni á Hamarshöllina og á þá ákvörðun þáverandi meirihluta um að endurnýja dúkinn sem þó var gert með fullri vitund og vilja íþróttafélagsins.“

Aldís segir að tekin hafi verið ákvörðun um að ganga ekki frá endanlegum samningi.

„Vegna þess líka að núverandi meirihluti, þau sem vinna kosningarnar, þau gera það ekki síst vegna andstöðu sinnar við Hamarshöllina.“

Saka Sjálfstæðisflokk um aðgerðarleysi

Hamarshöllin hafi verið stóra málið í kosningunum. Núverandi meirihluti segir að þar sem pöntunarferli sé í byrjunarfasa vegna aðgerðarleysis Sjálfstæðisflokks sé ekki víst hvort hægt verði að koma húsinu upp fyrir veturinn. 

Aldís segir að ekki sé hægt að komast hjá þeirri staðreynd að núverandi meirihluti vildi ekki höllina, því sé viðsnúningur Framsóknar og Okkar Hveragerðis í málinu með ólíkindum.

„Það hefði verið mjög óábyrgt af okkur að undirrita, eða vinna og klára samning sem þar fyrir utan hefði þurft að fara fyrir bæjarstjórn örfáum dögum fyrir kosningar og binda þannig hendur meirihluta sem vildi ekki húsið,“ segir Aldís.

Bæjarfulltrúar Sjálfstæðisflokks í Hveragerði taka undir með Aldísi og segja viðsnúning nýs meirihluta í málefnum Hamarshallarinnar með ólíkindum.

„Var gagnrýni á Hamarshöllina eingöngu sett fram til að slá ryki í augu kjósenda og til að þyrla upp moldviðri í eigin þágu með það að markmiði að vinna kosningar? Skyndilega er það orðið afar slæmt að pöntun á dúk sé í byrjunarfasa og ekki sé búið að klára samningagerð þannig að hægt sé að byggja upp Hamarshöllina að nýju strax í haust. Er þessi málflutningur með öllu óskiljanlegur enda í engu samræmi við það sem þessir sömu aðilar sögðu fyrir kosningar,“ segir í tilkynningu frá bæjarfulltrúum Sjálfstæðisflokks í bænum.

Tekist á um höllina

Í tilkynningunni kemur fram að öllum hafi verið ljóst að Okkar Hveragerði og Framsókn hafi verið mjög á móti loftborna íþróttahúsinu. 

„Í kjölfar þessarar umræðu fór í gang undirskriftasöfnun meðal íbúa þar sem óskað var borgarafundar og mikill hiti var í umræðunni um málið. Íbúafundur var síðan haldinn örfáum dögum fyrir kjördag 14. maí, þar sem engum gat dulist hversu mjög fulltrúar O-listans og Framsóknar var á móti kaupum á nýjum dúk og endurreisn Hamarshallarinnar.“

Því taldi þáverandi meirihluti ráðlagt að bíða með undirritun samnings þar til niðurstaða kosninganna lægi fyrir.