Einn lést þegar hrað­lest fór af teinunum í Suður-Kína

Ríkismiðillinn CCTV greinir frá lestarslysinu sem átti sér stað klukkan hálf ellefu að staðartíma í morgun. Miðillinn greinir einnig frá því að lestarstjórinn hafi látist af sárum sínum á spítala. Einn áhafnarmeðlimur og sjö farþegar slösuðust í slysinu en hinir 136 farþegarnir voru fluttir örugglega burt af slysstað. Atvikið er til rannsóknar hjá yfirvöldum samkvæmt CCTV.

Frá árinu 2008 hefur Kína byggt upp háhraðajárnbrautarkerfi sitt sem er í heildina 37.900 kílómetrar og sker landið í þvers og kruss til að tengja saman allar stærstu borgir þess. 

Í frétt CNN um lestarslysið kemur fram að engin stórvægileg atvik hafi átt sér stað á járnbrautarkerfinu síðan 2011 þegar 40 létust og næstum 200 slösuðust þegar tvær hraðlestir rákust saman nálægt Wenzhou í Zheijang-héraði.