Thibaut Cour­tois, Edwin van der Sar og Oli­ver Kahn

Fyrir leik helgarinnar höfðu aðeins markverðirnir Oliver Kahn og Edwin van der Sar verið valdir menn leiksins af UEFA, knattspyrnusambandi Evrópu, í úrslitaleik Meistaradeildar Evrópu. Þeir Kahn og Van der Sar - sem í dag starfa fyrir Ajax og Bayern München - voru í París líkt og FH-ingurinn Viðar Halldórsson sem birti mynd af þeim fyrir leik.

Það var því frekar ljóðrænt að Courtois hafi boðið upp á frammistöðu sem þýddi að hann væri þriðji markvörðurinn til að vera valinn bestur í úrslitaleik Meistaradeildar Evrópu. Munurinn var sá þó að Belginn fljúgandi hélt hreinu í sínum leik en bæði Kahn og Van der Sar fóru í vítaspyrnukeppni er þeir unnu Meistaradeildina.

Kahn sá til þess að Bayern landaði sigri gegn Valencia vorið 2001 þar sem hann varði þrjár vítaspyrnur og reyndist hetja Bæjara.

Van der Sar tryggði Manchester United sigur í Meistaradeild Evrópu vorið 2008 þegar hann varði vítaspyrnu Nicolas Anelka. 

Dugði það til að vera valinn maður leiksins af UEFA en að öllum líkindum hefði Cristiano Ronaldo orðið fyrir valinu hefði hann ekki klúðrað sinni vítaspyrnu þar sem hann skoraði mark Man United í venjulegum leiktíma.

Alls varði Courtois níu skot í leiknum gegn Liverpool, aldrei hefur markmaður varið fleiri skot í úrslitaleik Meistaradeildar Evrópu.

Af þessum níu vörslum voru að lágmarki þrjár hreint út sagt frábærar. Hann varði meistaralega frá Mohamed Salah af stuttu færi í fyrri hálfleik sem og frá Sadio Mané þegar það virtist nær öruggt að boltnn myndi enda í netinu.

Mané lék á mann og annan vinstra megin í teig Real og náði bylmingsskoti niðri í hægra horn Courtois. Á einhvern ævintýralegan hátt tókst þessum hávaxna markverði að grýta sér niður og blaka boltanum í stöngina. 

Í síðari hálfleik var það Salah sem gerði sig hvað líklegastan til að skora fyrir Liverpool. Egyptinn átti skot af löngu færi sem virtist stefna í stöng og inn en Belginn varði. Síðast en ekki síst þá varði Courtois frábærlega frá Salah úr þröngu færi.

Stórfengleg frammistaða og fimmti Evróputitill Real á síðust tíu árum staðreynd. Courtois nýtti viðtal eftir leik til að láta stuðningsfólk á Englandi heyra það. Honum finnst hann eiga meiri virðingu skilið og það má reikna með að hann fái hana eftir frammistöðu helgarinnar og vetrarins.