Aldrei lent í öðru eins á löngum sjálf­boða­liða­ferli

Myndbandið, sem tekið var á dyrabjöllumyndavél, fór í dreifingu, meðal annars á samfélagsmiðlinum Twitter, og hefur vakið nokkra umræðu um það viðmót sem sjálfboðaliðar flokkanna mæta. Úthringingar og önnur hefðbundin verkefni, sem fjölmargir sjálfboðaliðar koma að, eru í fullum gangi í aðdraganda sveitarstjórnakosninganna á morgun.

„Ég var bara að dreifa rósum og hringi bjöllunni í þessu húsi. Það svarar enginn og ég ætlaði bara að fara að labba í burtu. Þá svarar í dyrasímanum og spyr hvort ég sé frá Samfylkingunni. Ég segi já, og að ég hafi bara ætlað að vita hvort ég mætti bjóða honum rauða rós,“ segir Elín Soffía í samtali við fréttastofu.

Maðurinn hafi þá einfaldlega sagt henni að setja rósina í „gráu tunnuna“.

„En svo gerist það sem er búið að klippa úr myndbandinu. Þá segi ég: Nei, það geri ég aldrei. Þá segist hann hafa verið að djóka og biður mig að setja rósina á bekk við húsið.“

Maðurinn hafi þá tjáð henni í gegnum dyrasímann að hann væri á leiðinni heim og kæmi eftir um tíu mínútur. Hann hafi því í raun þegið rósina.

„Síðan ætlar hann að vera fyndinn og sýna hvað hann var töff að segja mér að henda rósinni og klippir myndbandið.“

Miður sín að sjá myndbandið í dreifingu

Myndbandið fór í víðtæka dreifingu á netinu og var meðal annars sett inn á Twitter í gær. Það virðist þó hafa gengið manna á milli fyrir það, þar sem sá sem birti myndbandið á Twitter er ekki sá sem tók það. Elínu Soffíu var nokkuð brugðið að komast að því að myndband af henni í sjálfboðastarfinu hafi náð flugi á netinu, en það hefur síðan verið fjarlægt eftir gagnrýni netverja.

„Svo er þetta komið eitthvað á Twitter. Ég er ekki einu sinni á Twitter. Ég er búin að vera í sjálfboðaliðastarfi fyrir flokka og í forsetakosningum síðan ég var sextán ára, og nú komin á sjötugsaldur. Ég hef bara aldrei orðið fyrir svona, þarna er bara verið að gera lítið úr manni.“

Elín Soffía segist hafa orðið miður sín að frétta af því að myndbandið væri komið í dreifingu á netinu.

„Mér hefði aldrei dottið í hug að einhver myndi taka mann upp á myndband heima hjá sér og birt á samfélagsmiðlum. Þetta er bara friðhelgi, að einhver bara birti myndband af manni og reyni að gera lítið úr manni,“ segir Elín Soffía og bæti við að sér hafi þótt atvikið lágkúrulegt.

Hún segist hafa heyrt frá fjölda fólks sem sá myndbandið, og fengið mikinn stuðning.

„Fólki finnst þetta bara ferlega ómerkilegt, að vera að ráðast svona á fólk sem er að vinna sjálfboðavinnu. Mér er alveg sama hvaða flokkur það er, ég þekki fólk í öllum flokkum og á marga vini alls staðar. Ég man bara ekki eftir því að það hafi verið ráðist svona á fólkið sem er að vinna fyrir flokkana.“

Eitt gildi um frambjóðendur en annað um sjálfboðaliða

Elín Soffía telur að öðru sæti um fólk sem er í framlínunni, frambjóðendur flokkanna. Þeir megi frekar vænta þess að verða skotspónn fólks á netinu og sæta gagnrýni fyrir orð sín og verk.

„En við, sem erum að aðstoða. Mér finnst mikill eðlismunur á því hvort þú ert að ráðast á oddvitana og frambjóðendur, eða fólkið sem er að leggja sig fram, vill hjálpa flokkunum, fær engin laun fyrir og er bara að gera þetta af áhuga. Alveg sama í hvaða flokki það er. Á þetta þá að vera til þess að fæla fólk frá því að taka þátt og hjálpa flokkunum,“ spyr Elín Soffía.

Þrátt fyrir að hafa þótt atvikið leiðinlegt segist Elín Soffía hvergi af baki dottin. Hún tók sæti á Alþingi sem varaþingmaður Reyknesinga fyrir Alþýðuflokkinn og hefur lengi verið í ýmiskonar sjálfboðastarfi. Hún hafi þó aldrei lent í neinu svipuðu.

„Aldrei. Alltaf gengið vel. Ég byrjaði ung í þessu og er búin að vera dreifa rósum frá 1986 og aldrei lent í svona.“

Telur um persónuverndarbrot að ræða

Elín Soffía segist þá ekki í neinum vafa um að myndbandsupptakan sé ólögleg, þó hún sjái ekki fyrir sér að fara með málið neitt lengra.

„Þetta er náttúrulega ólöglegt samkvæmt persónuvernd, ég bara trúi ekki öðru.“

Málið hefur vakið nokkra umræðu á netinu um það viðmót sem sjálfboðaliðar flokka í kosningabaráttu mæta í starfi sínu, en sýnishorn af þeirri umræðu má sjá hér að neðan.