Oddvitaáskorunin: Slakaði á með því að hlusta á upptökur af morgunleikfimi Rásar eitt

Dagur B. Eggertsson leiðir lista Samfylkingarinnar í Reykjavík í komandi sveitarstjórnarkosningum.

Dagur B. Eggertsson er borgarstjóri í Reykjavík. Dagur er oddviti Samfylkingarinnar í borgarstjórn og fyrrverandi varaformaður flokksins. Hann hefur gegnt embætti borgarstjóra frá árinu 2014.

Dagur fæddist 19. júní 1972. Hann er fæddur í Osló en uppalinn í Árbænum, sonur Eggerts Gunnarssonar dýralæknis og Bergþóru Jónsdóttur lífefnafræðings. Maki Dags er Arna Dögg Einarsdóttir læknir á Landspítalanum – háskólasjúkrahúsi. Þau eiga dæturnar Ragnheiði Huldu og Móeiði og synina Steinar Gauta og Eggert.

Hver er fallegasti staðurinn á Íslandi?

Elliðaárdalur á stilltu haustkvöldi.

Er eitthvað lítilvægt sem fer þó í taugarnar á þér í þínu sveitarfélagi sem þú vilt að sé lagað?

Sóðaleg umgengni og tillitsleysi við náungann.

Hvert er þitt uppáhalds áhugamál sem gæti þótt skrítið?

Þegar ég var vansvefta ungbarnaforeldri hlustaði ég á gamlar upptökur af morgunleikfimi rásar eitt til að ná slökun.

Hver eru þín minnistæðustu samskipti við lögregluna?

Þegar ég var handtekinn fyrir að ganga yfir golfvöllinn í Grafarholti, 12 ára. Við höfðum verið að njósna um unglingana sem voru í árlegri útileigu í Paradísardal. Var sleppt eftir yfirheyrslu!

Hvað færðu þér á pizzu?

Pizza Roma á Horninu er í uppáhaldi.

Hvaða lag peppar þig mest?

Higher með GusGus.

Hvað getur þú tekið margar armbeygjur?

Einni fleiri en Steinar sonur minn í hvert sinn sem við keppum. Síðast var það 51.

Göngutúr eða skokk?

Göngutúr.

Uppáhalds brandari?

Þeir sem kalla fram bros hjá Örnu konu minni.

Hvað er þitt draumafríi?

Þau sem eru með allri fjölskyldunni. Bílaleiguferð um Pólland þvert og endilangt. Ógleymanleg ferð niður strendur Albaníu og ferðir um Ísland í covid koma fyrst upp í hugann.

Hvort fannst þér 2020 eða 2021 vera verra ár?

Bæði að baki.

Uppáhalds tónlistarmaður?

Nick Cave.

Hvað er það skrýtnasta sem þú manst eftir að hafa gert?

Við Arna ákváðum að fara í óundirbúna þriggja mánaða bakpokaferð um Mexico og Mið-Ameríku eftir brúðkaupið. Höfðum ekki pantað eina einustu gistinótt fyrirfram.

Ef það væri gerð kvikmynd um ævi þína, hver ætti að leika þig? Má vera íslenskur eða útlenskur.

Björn Thors væri draumurinn.

Hefur þú verið í verbúð?

Nei, en ég vann á höggbor utan á fiskvinnsluhúsinu á Grandanum eitt sumar þegar ég vann í múrviðgerðum. Borðaði heilt heilhveitibrauð í hádegismat á hverjum degi.

Áhrifamesta kvikmyndin?

Cinema Paradiso.

Áttu eftir að sakna Nágranna?

Ó, nei.

Ef þú yrðir að flytja úr þínu sveitarfélagi, hvert myndir þú helst vilja fara?

Ísafjarðar.

Uppáhalds „guilty pleasure“ lag? (skammast þín smá fyrir að hafa gaman af því – sakbitin sæla)

Smalltown Boy með Bronski Beat.