Fyrsta mál ein­stak­lings tengt Dar­fúr til kasta Al­­þjóð­­lega stríðs­­glæpa­­dóm­­stólsins

Abd-Al-Rahman, einnig þekktur sem Ali Kushayb, er ákærður fyrir stríðsglæpi og glæpi gegn mannkyni sem framdir voru á árunum 2003 til 2004, en ákæran er í 31 lið. Hann neitaði sök í málinu í morgun.

Átökin í Darfúr-héraði hófust þegar uppreisnarhópar hófu skæruhernað gegn stjórnarher landsins, þar sem þeir töldu sig vera undirokaða. Omar al-Bashir Súdansforseti svaraði árásunum með stórfelldum árásum gegn uppreisnarhópunum og hafa ásakanir um fjöldamorð, nauðganir og stríðsglæpi gengið á víxl.

Áætlað er að um 300 þúsund manns hafi látist á átökunum og nærri 2,7 milljónir manna þurft að flýja heimili sín vegna átakanna.

Al-Bashir er nú í fangelsi í höfuðborginni Kartúm þar sem hann hefur verið frá því að herinn bolaði ríkisstjórn hans frá völdum árið 2019. Hann hefur sömuleiðis verið ákærður fyrir þjóðarmorð og glæpi gegn mannkyni.

Abd-Al-Rahman er sakaður um morð, pyndingar, nauðgun, ofsóknir og árásir gegn óbreyttum borgurum þegar hann gegndi stöðu leiðtoga uppreisnarhópsfrá ágúst 2003 og apríl 2004.

Réttarhöldin hefjast um svipað leyti og fréttir hafa borist af mannskæðum átökum í Darfúr-héraði.