„Þetta er ömur­legt á­stand og þjóðinni ekki bjóðandi“

Þingmenn fordæma ummæli Sigurðar Inga

Björn Leví Gunnarsson þingmaður Pírata kvaddi sér hljóðs undir dagskrárliðnum Fundarstjórn forseta þar sem hann vakti athygli á orðum sem Sigurður Ingi lét falla í Reykjavík síðdegis á Bylgjunni í gær. Hann var þar að ræða leigubílafrumvarpið en taldi að það strandaði á málþófsáráttu stjórnarandstöðunnar.

Viðtalið við Sigurð Inga má finna í spilaranum hér neðar, en það er um og við fjórðu mínútu sem hin umdeildu ummæli falla.

„Vonandi hættir þingið að vera í þessum hægagangi, þar sem ekkert er afgreitt, stjórnarandstaðan er eiginlega með þingið í gíslingu í einhverju málþófi og fundarstjórn. Þess vegna gat ég nú kíkt hingað. Ég átti að vera niðri á þingi en það er bara látlaust verið að tala um eitthvað annað og öll mál tekin í gíslingu,“ sagði ráðherra við útvarpsmenn Bylgjunnar.

Stjórnarandstaðan telur Sigurð henda steinum úr glerhúsi

Stjórnarandstöðunni þótti þarna, svo vægt sé til orða tekið, Sigurður Ingi vera að henda steinum úr glerhúsi. Björn Leví taldi þetta áhugavert viðhorf því að væri nú einu sinni meirihluti flokka á þingi sem tæki sér dagskrárvaldið og þau hagi málum þannig að mál frá ríkisstjórninni koma inn í þingflokka þeirra og eru rædd fram og til baka en ekkert sé leitað til hinna þingmannanna sem eru á þingi.

„Ekki neitt. Það er að sjálfsögðu hlutverk okkar að mæta hér í ræðustól Alþingis og kynna málin fyrir þingi og þjóð, benda á gallana, sem við fengum ekki aðkomu að þegar var verið að fjalla um þau, áður en þau komu til þingsins. Þetta er eðlileg lýðræðisleg umræða,“ sagði Björn Leví og það var sem opnað væri fyrir flóðgátt.

Jóhann Páll Jóhannsson Samfylkingu sagðist einnig hafa heyrt „þessi ótrúlegu ummæli“ Sigurðar Inga og þau væru „auðvitað ævintýralega röng lýsing“. Stjórnarmeirihlutinn fari með dagskrárvaldið á þinginu. 

„Þessi ummæli endurspegla líka alveg ofboðslegt óþol forystufólks í Framsóknarflokknum fyrir því að það eigi sér stað pólitísk umræða í þessum sal.

Þá meðal annars um þingmál frá ráðherrum ríkisstjórnarinnar,“ sagði Jóhann Páll.

Halla Signý hellir olíu á eldinn

Og þannig gekk dælan, fjöldi þingmanna notaði tækifærið og lýstu því að þeir skildu ekki erindi Framsóknarflokksins, svo sem Þorgerður Katrín Gunnarsdóttir formaður Viðreisnar og Helga Vala Helgadóttir þingmaður Samfylkingar. Og aðrir bentu á að ráðherrar Framsóknarflokksins hafi eytt ómældum tíma þingsins í að leggja fram ónýt mál, og var þar vísað til bagg-frumvarps Willums Þórs Þórssonar heilbrigðisráðherra.

Það var svo ekki til að bæta úr skák þegar Halla Signý Kristjánsdóttir þingmaður Framsóknar sté í pontu og vildi verja sinn formann með því að beina athygli að því að þetta væri umræða um form en ekki efni. Í mars hefði verið tekinn sex og hálfur klukkutími í mars í þennan lið, fundarstjórn forseta. Hún fór fram á það við forseta „að það verði gerð ítarlegri leiðbeiningar til þingmanna hvernig eigi að haga sér undir þessum dagskrárlið.“

Grátbiður þingmenn um að hætta í sandkassaleik

Þannig gekk mikið á en þegar Hilda Jana Gísladóttir frá Akureyri, varaþingmaður Samfylkingar, tók til máls vissu menn ekki hvort þeir áttu að hlæja eða gráta:

„Ég settist á þing í gær. Og ég get sagt ykkur það að þetta er ótrúlega dapurt umhverfi sem ég er að labba inn í. 

Það er mér svo mikil sorg í hjarta að koma inn í þetta ástand og sjá hvað er í gangi bak við tjöldin,“ sagði Hilda Jana og lýsti því að hún hafi heyrt að fólk takist jú á um mál en séu að mestu sammála. Og jafnvel vinir utan þess.

„Þetta var það sem maður heyrði framanaf. En þetta er ömurlegt ástand. Og þjóðinni ekki bjóðandi. Það er erfitt að útskýra fyrir 17 ára dóttur minni sem langar að vita hvernig störfin hérna fara fram, hvað er eiginlega að gerast. Því ekki skil ég það. Ég vona að allir leiti lausna til að nýta þessa frábæru þekkingu og fólk sem er hér í salnum. Til þess að vinna fyrir þjóðina og hætta þessum sandkassaleik,“ sagði Hilda Jana.