Innlent

Mæðgur segjast ætla að búa á Dalatanga til eilífðarnóns

Kristján Már Unnarsson skrifar
Bændurnir á Dalatanga, dóttirin Aðalheiður Elfríð Heiðarsdóttir og mamman Marsibil Erlendsdóttir.
Bændurnir á Dalatanga, dóttirin Aðalheiður Elfríð Heiðarsdóttir og mamman Marsibil Erlendsdóttir. Einar Árnason

Mæðgur sem sinna búskap, veðurathugunum og vitavörslu á Dalatanga, einni afskekktustu bújörð landsins, eru búnar að kaupa húsakost á jörðinni af ríkinu. Þar rækta þær sauðfé og hunda og segjast vera að fjárfesta til framtíðar.

Í fréttum Stöðvar 2 var sýnt frá Dalatanga en mamman Marsibil Erlendsdóttir og dóttirin Aðalheiður Elfríð Heiðarsdóttir voru heimsóttar í þættinum Um land allt.

Vitarnir á Dalatanga eru tveir. Sá ljósi til hægri er elsti uppistandandi viti á Íslandi.Einar Árnason

Dalatangi er á nesinu milli Seyðisfjarðar og Mjóafjarðar og gegnir enn þýðingarmiklu hlutverki fyrir sjófarendur. Gamli vitinn þar er sá elsti sem enn stendur uppi á Íslandi.

„Ég kom hingað ´68 með pabba og mömmu. Þá fluttu þau hingað frá Siglunesi við Siglufjörð með sjö börn og allt sitt hafurtask,“ segir Marsibil, sem kallast núna vitagæslumaður. Formlega er enginn lengur á Íslandi með starfsheitið vitavörður.

Við fjárhúsin á Dalatanga.Einar Árnason

Auk þess að sinna vitagæslu og veðurathugunum á Dalatanga eru þær með sauðfé og hross og mamman ræktar og selur smalahunda. Dóttirin Aðalheiður flutti aftur heim úr borginni fyrir sjö árum eftir háskólanám og hún segist vera kindakonan.

„Ég bara nennti ekki lengur að vera í Reykjavík. Allt í einu langaði mig bara til þess að prófa að rækta kindur og það var geðveikt gaman. Þannig að ég held alla vega áfram með það.“

-Sérðu fyrir þér að vera hérna áfram og taka við af mömmu kannski?

„Ja.. við verðum bara hérna til eilífðarnóns. Hún verður hérna eldgömul hjá mér einhvern tímann,“ svarar Aðalheiður og hlær um leið og hún bendir á mömmu sína.

Marsibil þjálfar og ræktar Border Collie-smalahunda

Þær deila sömu einangrun með öðrum Mjófirðingum, að vera hálft árið án vegasambands við þjóðvegakerfið. Þær eru þó enn fjær skarkalanum því það tekur 20-30 mínútur að aka úr Brekkuþorpi út á Dalatanga, ef færið er ekki þeim mun verra.

-Þið eruð búnar að kaupa Dalatangahúsin?

„Já, við erum búnar að kaupa öll hús.“

-Þannig að þið eruð að fjárfesta til framtíðar?

„Já, já, já. Það þýðir ekkert annað en að vera bjartsýnn,“ segir Marsibil og hlær.

Séð yfir bæjarhúsin á Dalatanga. Vitarnir eru fjær.Einar Árnason

Og núna er kominn ljósleiðari á Dalatanga með öflugri nettengingu.

„Nú getur maður talað við fólkið sitt bara beint í gegnum tölvuna, bara „live“. Það er bara fáránlegt. Svo maður er aldrei einmana eða neitt. Ég finn aldrei fyrir því. Ef maður vill tala við einhvern, þá hringir maður bara,“ segir Marsibil.

Hér má sjá frétt Stöðvar 2:

Þáttinn Um land allt úr Mjóafirði má nálgast á streymisveitunni Stöð 2+. Hér má sjá níu mínútna kafla frá Dalatanga úr þættinum:

Um land allt Fjarðabyggð Byggðamál Samgöngur Landbúnaður Hundar Veður

Tengdar fréttir

Sagt var að í Mjóafirði byggju bara nokkrar þrjóskufullar manneskjur

„Í Mjóafirði búa ekkert nema nokkrar þrjóskufullar manneskjur sem bíða dauða síns,“ segir Sigfús Vilhjálmsson, útvegsbóndi á Brekku, og skellir upp úr, en tekur fram að þetta hafi Jónas Árnason sagt. Sigfús segist alls ekki viðurkenna að þetta eigi við um íbúa Mjóafjarðar.

Hvetur til þess að Íslendingar grafi mörg jarðgöng samtímis

Bæjarstjóri Fjarðabyggðar, fjölmennasta sveitarfélags Austurlands, hvetur til þess að Íslendingar taki Færeyinga sér til fyrirmyndar í jarðgangagerð og grafi mörg göng samtímis. Hann segir lykilatriði að hringtengja Austfirði með jarðgöngum, - það sé eina leiðin til að tryggja framtíð Mjóafjarðar.

Mest lesið


Fleiri fréttir

Sjá meira


×

Mest lesið