Í tilkynningu til Kauphallarinnar kom fram að Eyjólfur Árni Rafnsson, stjórnarformaður Eikar og Samtaka atvinnulífsins, og Kristín Friðgeirsdóttir, fjármálastjóri Sýnar, hefðu upplýst tilnefningarnefnd fasteignafélagsins um að þau myndu ekki bjóða sig fram í stjórn félagsins. Eyjólfur Árni hefur setið í stjórn Eikar frá árinu 2016 en Kristín frá því í fyrra.
Í stjórninni sitja einnig Guðrún Bergsteinsdóttir, eigandi LOCAL lögmanna, Hersir Sigurgeirsson, dósent í fjármálum við viðskiptafræðideild Háskóla Íslands, og Ragnheiður Harðar Harðardóttir, forstjóri Opinna kerfa.
Fjárfestingafélagið Brimgarðar er langsamlega stærsti hluthafi Eikar með ríflega 16 prósenta beinan hlut en næst á eftir kemur Gildi lífeyrissjóður með 8,7 prósenta hlut.
Fulltrúar Brimgarðar hafa haft sterkar skoðanir á fyrirkomulagi stjórnarkjörs hjá Eik, einkum tilnefningarnefnd. Fjárfestingafélagið hefur, til að mynda, kallað eftir hámarkslengd á setu hvers stjórnarmanns, og því að sjálfkrafa verði gripið til margfeldiskosninga.
Var þessum tillögum ætlað að auka endurnýjun og veita þeim sem eru á móti niðurstöðum tilnefninganefnda tækifæri til að hafa áhrif á samsetningu stjórnar. Þá hafa Brimgarðar einnig gert athugasemdir við að varaformaður stjórnar sé á sérkjörum miðað við óbreytta stjórnarmenn.
Stjórnarkjör á síðasta aðalfundi Eikar var ekki í samræmi við tillögur tilnefningarnefndar en þá kom Ragnheiður Harðar ný inn í stjórnina í stað Bjarna K. Þorvarðarson, sem nefndin hafði mælti með.
