Bretar segja að NATO hersveitir muni ekki verjast innrás í Úkraínu

Í viðtali við tímaritið Spectator segir hann að forystumenn NATO ríkja ættu ekki að gefa annað í skyn. Rússar hafa bætt í herafla sinn við landamærin að Úkraínu undanfarnar vikur og er talið að þar séu nú sjötíu þúsund hermenn og þungavopn.

Vestræn ríki hafa hvatt Vladimir Putin Rússlandsforseta til að draga herafla sinn til baka og hóta hertum viðskiptaþvingunum geri Rússar innrás í Úkraínu. Á föstudag svaraði Putin með lista af kröfum sem verða að teljast algerlega óaðgengilegar af aðildarríkjum NATO.

Meginkrafan er að vestræn NATO ríki dragi allan herafla sinn til baka frá Eystrasaltsríkjunum og Póllandi og lýsi því yfir að Úkraína og Georgía fái aldrei aðilda að Atlantshafsbandalaginu.

Putin klæðir hörku sína gagnvart Úkraínu með því að hún sé svar við óskum stjórnvalda þar til að gerast aðilar að NATO.

Hörkuna í samskiptum ríkjanna og Rússa við NATO ríkin má hins vegar rekja til falls gjörspilltrar leppstjórnar Rússa í Úkraínu árið 2013, innlimunar Rússa á Krímskaga árið 2014 og stuðnings Rússa við uppreisnaröfl í austurhluta Úkraínu og beinni þátttöku rússneskra hermanna í átökum við stjórnarher Úkraínu.

Putin hefur alltaf þrætt fyrir að rússneskir hermenn væru innan landamæra Úkraínu þótt sannanir fyrir því hafi hlaðist upp. Hann segir þetta vera rússneska sjálfboðaliða sem vilji verja rússneska minnihlutan í Úkraínu fyrir ofsóknum stjórnvalda þar.

Skutu niður farþegaþotu

Ein fyrsta sönnunin fyrir þátttöku Rússa í hernaði innan Úkraínu var þegar farþegaflugvél Malaysia Airlines var skotin niður yfir Úkraínu með háþróuðu rússnesku flugskeyti hinn 17. júlí árið 2014. Allir um borð, 284 farþegar og fimmtán manna áhöfn fórust.

Stjórnmálaskýrendur telja margir að Putin noti meinta ógn frá „fasistaríkjum" í vestri sem ásælist Úkraínu eins og það er yfirleitt kallað í rússneskum fjölmiðlum, til að skapa sér stöðu heimafyrir og breiða yfir afar bágborin kjör almennings í Rússlandi þótt þar sé að finna mesta fjölda milljarðamæringa í heiminum sem ekki eru feimnir við að flagga gífurlegum auðæfum sínum.

Rússneskir milljarðamæringar hafa til að mynda verið áberandi í bresku efnahagslífi og fjárfest í fjölda fyrirtækja þar og víðar um Vesturlönd. Breskir bankar á aflandssvæðum undir flaggi Breta hafa verið duglegir við að ávaxta fé rússneskra oligarka.

Efnahagsþvinganir Vesturlanda hafa mikið til beinst gegn þessum hópi milljarðamæringa sem flestir standa Putin mjög nærri og eru sumir þeirra jafvel taldir vera leppar fyrir gífurleg og falin auðæfi Putins sjálfs.