Guð­mundur Ingi verður sam­starfs­ráð­herra Norður­landa

Þetta var ákveðið á fundi ríkisstjórnarinnar í morgun. Guðmundur Ingi tekur við stöðunni af Sigurði Inga Jóhannssyni, núverandi innviðaráðherra, sem fór fyrir málaflokknum á síðasta kjörtímabili.

Samstarfsráðherra ber ábyrgð á norrænu ríkisstjórnarsamstarfi innan Norrænu ráðherranefndarinnar fyrir hönd forsætisráðherra.

Á vef forsætisráðuneytisins segir að Norræna ráðherranefndin hafi verið stofnuð árið 1971 og sé opinber samstarfsvettvangur ríkisstjórna Íslands, Danmerkur, Finnlands, Noregs og Svíþjóðar auk sjálfsstjórnarlandanna Álandseyja, Færeyja og Grænlands.

„Norræna ráðherranefndin vinnur að sameiginlegum lausnum á þeim sviðum þar sem Norðurlöndin geta náð betri árangri með því að vinna saman en að leysa verkefnin hvert í sínu lagi. Í framtíðarsýn Norrænu ráðherranefndin er sett það markmið að Norðurlöndin verði sjálfbærasta og samþættasta svæði heim fyrir 2030.“