Dagur í lífi Söru Sigmunds í Dúbaí

Sara hefur tilkynnt að hún muni keppa á Dubai CrossFit Championship frá 16. til 18. desember en þá verða aðeins átta mánuðir liðnir frá krossbandsaðgerð hennar. Hún segir það vera markmiðið en það fari líka mikið eftir því hvernig gangi hjá henni í endurhæfingunni.

Eftir að Sara fékk grænt ljós frá læknunum þá hefur hitnað hjá henni á æfingunum í bókstaflegri merkingu því hún flaug suður til Dúbaí í Sameinuðu arabísku furstadæmunum. Sara gat farið að æfa á fullum krafti og fær tvo mánuði til að gera sig aftur keppnisklára.

Er líka að hugsa um Billy

Í myndbandinu „Behind the Rune“ fer Sara yfir ákvörðun sína að flytja sig til Dúbaí.

„Það eru sex mánuðir frá því að ég fór í krossbandsaðgerð og þið munið hér sjá einn dag hjá mér í Dúbaí,“ sagði Sara Sigmundsdóttir í byrjun myndbandsins.

Sara segir frá æfingum sínum, heimsókn til sjúkraþjálfara og nýju hlutverki sínu að gæta hundsins Billy á meðan eigandi hans er í Englandi.

„Ástæðan fyrir því að ég kom til Dúbaí er að hér hef ég allt til alls. Ég get fengið hér rétta matinn, ég hef sjúkraþjálfarann minn hér, ég hef aðgang að æfingasal og það er svo gott andrúmsloft hér. Það styðja mig allir og eru líka tilbúnir að ýta mér áfram á æfingunum.,“ sagði Sara.

Tók ákvörðunin fimm mánuðum eftir aðgerð

„Ég tók þessa ákvörðun fimm mánuðum efir aðgerð því ég þurfti að komast eitthvert í búblu til að geta verið klár fyrir Dubai Championship í desember,“ sagði Sara.

„Ég er bjartsýn á það að ég geti keppt en þá verða samt bara liðnir átta mánuðir frá aðgerðinni, Það tekur vanalega átta til tólf mánuði að ná því að æfa á fullum krafti og ég ætla að fara að keppa á þeim tíma. Ég er vongóð um að geta keppt en einhver sagði mér það í byrjun ferlisins að það væri enginn möguleiki á því. Mitt svar var: Þú hefðir ekki átt að segja þetta,“ sagði Sara og hló.

„Ég mun gera allt sem ég get og það eina sem ég hugsa um á æfingunum núna er: Ef þú slakar á núna þá verður þú ekki tilbúin. Af hverju ættir þú að hægja á þér núna? Þú finnur ekkert til og ert bara þreytt,“ sagði Sara.

Markmiðunum þínum er skítsama um hvernig þér líður

„Ég fann þessa frábæru tilvitnun fyrir tveimur mánuðum og ég hugsa um hana á hverjum degi. Þar stóð: Markmiðunum þínum er skítsama um hvernig þér líður. Ef þér líður ekki nógu vel þann daginn þá er markmiðunum alveg sama og á meðan eru allir aðrir að verða betri,“ sagði Sara.

„Ég yrði reið út í sjálfa mig ef ég gerði ekki allt til að verða tilbúin. Ef ég hef gert allt í mínu valdi að mínu mati, tveimur dögum fyrir keppni, og er samt ekki tilbúin þá verð ég ánægð með mig því þá hef hef ég gefið allt mitt,“ sagði Sara

Stærsta markmiðið eru heimsleikarnir

„Mitt stærsta markmið er að keppa á heimsleikunum í CrossFit í ágúst og standa mig betur en síðast þegar ég varð í 21. sæti. Ég var ekki alveg lík sjálfri mér þá. Ég er að vonast til þess að verða ein af tíu bestu á heimsleikunum 2022,“ sagði Sara.

Það má sjá allt myndbandið hér fyrir ofan.