Var að horfa á konuna en ekki köttinn

Vésteinn Örn Pétursson skrifar 24. október 2021 13:30

„Á meðan ég var að föndra við hjólið mitt og tefja tímann áður en ég lagði af stað í Melabúðina þá hugsaði ég hvernig ég gæti vakið athygli þína eitt augnablik,“ skrifar Þröstur meðal annars í færslunni. Vísir/Samsett

Færsla sem ljósmyndarinn Þröstur Guðlaugsson birti í Facebook-hópi Vesturbæinga hefur vægast sagt fengið mikil og góð viðbrögð. Færslunni er beint að konu sem hann átti í stuttum orðaskiptum við fyrir utan Kaffi vest í gær.

Hann segir markmiðið með færslunni ekki hafa verið að hafa uppi á konunni, en í ljósi viðbragðanna gæti þó verið gaman að komast að því hver hún er.

Færsla Þrastar er svohljóðandi:

Til þín sem komst inn á Kaffivest áðan, horfðir yfir salinn í leit að sæti og fannst þú ekki finna það, fékkst þér vatnssopna horfðir aftur beint í augu mér og gekkst svo út.

Það var laust sæti en kannski varstu svona hógvær, og þegar ég fór út nokkru seinna sá ég að þú hafðir fengið þér sæti á bekknum fyrir utan kaffihúsið og gulur köttur hreiðraði um sig í kjöltu þinni.

Þú horfðir aftur beint í augu mín og brostir.

Á meðan ég var að föndra við hjólið mitt og tefja tímann áður en ég lagði af stað í Melabúðina þá hugsaði ég hvernig ég gæti vakið athygli þína eitt augnablik svo ég stoppaði fyrir framan þig á bekknum og sagði “falleg” eða eitthvað svoleiðis held ég, þú leist upp og síðan á köttinn og sagðir “já er hún ekki kósý”..........

Ég vildi bara koma því til skila að ég átti ekki við köttinn heldur þig.

Ps. Eftir að hafa keypt mér hálfann kjúkkling og Pepsímax í Melabúðinni og var á leiðinni heim þá ásótti mig hugsunin um að skrifa um þetta atvik en ég veit ekkert af hverju ég set þessar hugsasnir fyrir almanna sjónir hérna en vanalega fara smásögurnar mínar beina leið í pappakassann hjá barnafötunum uppi á háalofti.

ps.ps þetta bréf er ekki kostað af Melabúðinni, PepsiMax eða Kaffivest.

Kveðja úr Vesturbænum.

Hissa á miklum viðbrögðum Vesturbæinga

Þegar þetta er skrifað hafa yfir átta hundruð meðlimir hópsins brugðist við færslunni, langflestir með like-putta eða hjarta. Verður það að teljast til marks um að færslan hafi vakið nokkra lukku í hópnum, hvar oftar en ekki er lýst eftir stolnum hjólum, týndum köttum eða athygli vakin á því sem ungdómurinn í hverfinu er að bardúsa hverju sinni.

Í samtali við Vísi segist Þröstur einfaldlega hafa verið í góðu skapi í gær og ákveðið að setja færsluna inn. Hann skrifi sjálfur af og til lýsingar á hversdagsleikanum, sem hann leggi þó ekki í vana sinn að deila með öðrum. Hann bjóst alls ekki við að viðbrögðin yrðu jafn mikil og raun bar vitni.

„Bara alls ekki. Ég er búinn að sitja á mér að svara þessu öllu,“ segir Þröstur. Fjöldi meðlima í hópnum hefur lýst yfir áhuga á að fá að fylgjast með framvindunni.

Ekki hugsunin að hafa uppi á konunni

En hefur konan gefið sig fram og hefur Þröstur yfir höfuð áhuga á því að vita hver konan er?

„Það var nú ekki hugsunin í upphafi, að leita eftir einhverju svari. En það væri voðalega gaman svona í þessari dramatík,“ segir Þröstur og vísar þar til þeirrar miklu athygli sem pósturinn hefur fengið.

„Ég held að hún sé nú jafnvel búin að læka þetta, en það er erfitt að sjá á Facebook.“

Þröstur segir af viðbrögðunum ljóst að fólk hafi áhuga á sögum sem þessum úr hversdagsleikanum.