Flott stigu á stokk á fyrstu Stofutónleikum góðra granna á Grand

Alda Music og Eyland Spirits, framleiðandi Ólafsson gins, eru meðal fjölda sprotafyrirtækja sem hafa komið sér fyrir á Grandanum þar sem áður var fyrst og fremst líflegur iðnaður tengdur sjávarútvegi.

„Það er gaman að fá að taka þátt í þessari frábæru uppsveiflu sem er á Granda. Hér hafa á undanförnum árum verið að spretta upp upptökustúdíó, vinnustofur listafólks og lítil nýsköpunar fyrirtæki. Það er ótrúlega mikð líf á svæðinu,“ segir Vala Sif Magnúsdóttir hjá Eyland Spirits.

Fastagestir á vinsældarlistum

Vala Sif segir að listafólkið sem kemur fram á tónleikunum sé í bland reynsluboltar og efnilegasta tónlistarfólk landsins.

„Í þessari umferð eru þetta Teitur Magnússon, Raven, Superserious, Axel Flóvent og Flott. Við hjá Eyland Spirits viljum styðja íslenska list og menningu og tónlistin er fyrsta skrefið, segir Vala.

Flott er ný íslensk hljómsveit sem var stofnuð árið 2020. Hún samanstendur af fimm ungum konum. Sveitin hefur vakið þó nokkra athygli frá því að hún gaf út sitt fyrsta lag Segðu það bara í lok nóvember sama ár. Öll lög sveitarinnar (öll fjögur) hafa lent á Vinsældarlista Rásar 2, efst í fyrsta sæti.

Tónleikarnir voru teknir upp að viðstöddum nokkrum gestum og eru ýmist rafmagnaðir eða órafmagnaðir.

Stefna á frekara samstarf

Sölvi Blöndal segir að þau hjá Alda Music hafi verið fljót að slá til þegar þessi pæling kom fram,

„Vala Sif kom með frábæra hugmynd um að breyta skrifstofunni sinni i tónleikastað. Við stóðumst ekki mátið um að vera með enda erum við Grandagrannar og Grandinn er fullkominn í svona nokkuð. Hrár, óskipulagður og skemmtilegur,” segir Sölvi.

Upptaka og eftirvinnsla á tónleikunum er í höndum Ketchup Creative sem er líka nágrannafyrirtæki á Granda.

Hugmyndin er að það verði framhald á samstarfi þessara skapandi fyrirtækja sem öll eru að framleiða með sínum hætti eitthvað til útflutnings frá Íslandi, tónlist, gin, menningu.

„Hérna á milli okkar í Eyland Spirits og Öldu Music við Eyjaslóð er stórt port. Við stefnum að því að halda þar útitónleika á næst ári sem verða opnir öllum og fólk getur skemmt sér saman á þessum frábæra stað sem Grandinn er,“ segir Vala.