Finnst í rauninni eins og það séu engin box eftir að tikk­a í

Hannes Þór hefur ákveðið að gefa ekki kost á sér með íslenska landsliðinu í framtíðinni enda orðinn 37 ára gamall og hefur í nægu að snúast bæði sem markvörður Vals og sem leikstjóri.

Þessi magnaði markvörður ræddi við Stöð 2 og Vísi um ákvörðun sína, landsliðið og ferilinn. Var viðtalið tekið við „vegginn fræga“ þar sem Hannes Þór æfði sig tímum saman á sínum yngri árum. Viðtalið má sjá í spilaranum neðst í fréttinni.

„Mér líður bara mjög vel að hafa getað gert þetta á Laugardalsvelli. Finn bara fyrir svona ákveðnum létti líka. Þetta er búið að vera frábær tími en nú er þessu lokið og það er ágætt að geta lokað þessum kafla. Svo er búið að rigna yfir mig kveðjum í allan dag, það er gaman og mér þykir vænt um það. Mér líður bara mjög vel með þessa ákvörðun.“

„Ég held ég hætti ekki við. Ég verð að standa við þetta,“ er ýjað var að því að hann gæti ekki hætt við eftir allan þann fjölda kveðja sem honum hefði borist.“

Íhugaði að hætta á Wembley

„Ég hélt nú að þetta væri bara komið þar. Auðvitað vorum við nýkomnir örugglega mestu vonbrigðum sem við höfum upplifað – þegar við missum EM sætið úr höndunum á síðustu mínútunum.“

„Ef ég tala fyrir sjálfan mig þá voru vonbrigðin eftir það að koma út eftir Englandsleikinn, þegar það verkefni var búið. Fyrir utan það að ég og nokkrir aðrir töldum að við hefðum verið að spila okkar síðasta leik þannig það voru mjög miklar tilfinningar í spilunum þar. Ég og Ari (Freyr Skúlason) og fleiri felldum nokkur tár eftir þann leik.“

„Síðan breyttust aðeins hlutirnir og mér fannst riðillinn vera þess eðlis þegar dregið var núna að við ættum góða möguleika. Ég og flestir ákváðum að taka slaginn áfram og sjá hvert það myndi leiða okkar.“

„Ég ákvað að taka slaginn út af möguleikanum að komast á HM.“

„Ég sá að við ættum raunhæfa möguleika á einu stórmóti í viðbót, síðan hafa hlutirnir þróast öðruvísi. Kynslóðaskiptin í liðinu eru að koma hraðar heldur en reiknað var með og við erum búnir að missa af lestinni.“

„Eftir að upplifa alla þessu frábæru tíma sem að ég hef upplifað með landsliðinu þá finnst mér í rauninni bara eins og það séu engin box eftir að tikka í. Þannig mér fannst tíminn vera réttur að segja stopp,“ sagði Hannes Þór að lokum. Fleiri bútar úr viðtalinu við þennan magnaða markvörð munu birtast á Vísi í dag og á morgun.