Chelsea kært vegna hegðunar leikmanna gegn Liverpool

Upp úr sauð undir lok fyrri hálfleiks þegar Liverpool fékk vítaspyrnu og Reece James var rekinn af velli fyrir að koma í veg fyrir mark með því að handleika knöttinn, en boltinn skoppaði í höndina af læri hans.

Edouard Mendy og Antonio Rudiger voru meðal þeirra Chelsea-manna sem mótmæltu niðurstöðu Anthony Taylor dómara. Þeir fengu báðir að líta gult spjald.

Thomas Tuchel, stjóri Chelsea, kvaðst eftir leik vera óánægður með dómgæsluna en Taylor skoðaði atvikið aðeins í örskamma stund á skjá áður en hann kvað upp sinn úrskurð.

Chelsea hefur frest fram á föstudag til að bregðast við kærunni.