Bjórþyrsti spéfuglinn sem Finnar geta reitt sig á

Finnar og Danir kláruðu leikinn á laugardag, aðeins skömmu eftir að læknum tókst að lífga Eriksen við. Hradecky varði vítaspyrnu í leiknum og Finnar unnu það sem fyrir fram hefði talist óvæntur sigur, 1-0, en augu þeirra líkt og heimsins alls hafa hins vegar beinst að Eriksen og hans heilsu.

„Já, samtölin í gufubaðinu, í rútunni og alls staðar þar sem við erum hafa snúist um þetta. Strákarnir eru alltaf að lesa fréttir og við fylgjumst stöðugt með stöðunni á Christian. Núna, nokkrum dögum eftir þetta slys, er útlitið sem betur fer gott,“ sagði Hradecky við Yle á æfingu finnska hópsins sem nú er kominn til Rússlands.

„Núna þegar við erum komnir lengra frá Kaupmannahöfn þá þarf einbeitingin að færast yfir á fótboltann,“ sagði Hradecky.

Hradecky verður eflaust í sviðsljósinu í dag í „vetrarstríðinu“ við Rússland kl. 13. Finnar þurfa á því að halda að þessi 31 árs gamli markvörður Leverkusen, sem áður lék með Frankfurt eftir að hafa slegið í gegn í Danmörku, verði upp á sitt besta svo þeir haldi áfram að koma á óvart.

Gott að verja með pungnum

Í grein í finnska miðlinum Ilta-Sanomat um Hradecky segir að það sé dæmigert fyrir hann að hafa sótt sér bjór til stuðingsmanns til að fagna, þegar Finnland vann Hvíta-Rússland 2-0 í vináttulandsleik fyrir þremur árum. Alltaf sé stutt í breiða brosið og óvenjulegt grín hjá honum, eins og þegar hann sagði ekkert vera betra fyrir markvörð en að verja skot með pungnum.

Skömmu eftir að hafa tekið drykkinn af stuðningsmanninum birti Hradecky mynd af þeim á samfélagsmiðlum, eftir að hafa gefið stuðningsmanninum kassa af bjór. „Skuldin er greidd núna,“ skrifaði markvörðurinn.

Mikilvægt að vera maður sjálfur

Í grein Ilta-Sanomat segir að þó að Hradecky geti verið kjaftfor „trúður“, sem njóti þess að fá sér smá bjór, þá sé hann fagmennskan uppmáluð þegar komi að æfingum og keppni.

„Það er alltaf ákveðið tabú varðandi bjórdrykkju. Bjór er til þess að drekka hann. Og varðandi blótsyrðin; 99,9% fólks blótar. Af hverju ættum við fótboltamenn að vera meiri dýrlingar en aðrir?

Fólk heldur að ég verði fullur á hverju kvöldi en það er ekki þannig. Auðvitað ekki, ég er atvinnumaður í fótbolta. Ég kveiki á Netflix, elda einhvern mat, tek einn bjór úr ísskápnum og hvíli mig svo. Á vissan hátt lifum við fótboltamenn eins og við séum inni á einhverri stofnun. Við þurfum að búa á bakvið luktar dyr. Ég held að það sé mikilvægt að vera maður sjálfur og sem betur fer uppgötvaði ég það snemma. Hvort sem maður starfar í alvarlegu umhverfi eða ekki þá verður maður að vera maður sjálfur,“ sagði Hradecky.

Leikur Finnlands og Rússlands hefst kl. 13 og er í beinni útsendingu á Stöð 2 EM. Þremur tímum síðar, eða kl. 16, mætast Tyrkland og Wales, og kl. 19 er leikur Ítalíu og Sviss.

EM 2020 verður sýnt á Stöð 2 Sport EM 2020 sem er hluti af Sportpakkanum, Stóra pakkanum og Risapakkanum. EM 2020 verður einnig hægt að kaupa stakt á kr. 6.990 en fyrir viðskiptavini með aðra áskrift en ofangreindar frá Stöð 2 kostar áskriftin kr. 3.990.