Sumarblað Veiðimannsins komið út

Sumarblað Veiðimannsins sem hefur komið út í rúmlega 80 ár er fjölbreytt að vanda. Varpað er upp svipmynd af Elliðavatni þar sem veiðimenn geta orðið fullnuma í silungsveiðifræðunum, bara ef þeir velja réttu fluguna og kasta rétt!

Veiðistaðalýsing af Flekkudalsá í Dölum er í blaðinu, sagt er frá nýrri ungmennadeild Stangaveiðisfélags Reykjavíkur og brugðið er upp svipmynd af nýjum stjórnarkonum SVFR en aldrei hafa fleiri konur setið í stjórn félagsins.

Veiðimaðurinn lærir að veiða Varmá - Þorleifslæk betur en þar er hægt að veiða allt frá apríl og fram í október. Sjóbirting, urriða, bleikju og jafnvel lax. Galdralöppin er töfrandi silungsfluga og er saga hennar sögð.

Fengsælar Sandárflugur eru einnig kynntar til leiks en veiðisumarið 2021 er fyrsta árið sem þessi dulmagnaða á er seld á almennum markaði.

Þá veitir Klaus Frimor, stórveiðimaður og leiðsögumaður, góð ráð um hvernig hægt er að bæta köstin og ná betri árangri á bakkanum. Nú er rétti tíminn til að bæta kasttæknina og undirbúa næstu veiðiferð. Veiðimaðurinn er klár í slaginn en ýmislegt fleira er á borð borið í blaðinu.

Veiðimaðurinn er nú í dreifingu til félagsmanna og áskrifenda en þeir sem geta ekki beðið ættu að skreppa í næstu veiðibúð, birgja sig upp fyrir sumarið og kippa með sér eintaki.