22 dagar í EM: Liðið sem Arnór Ingvi grætti, svelt stórþjóð og liðið sem fór auðveldustu leið sögunnar

Úkraína og Austurríki koma til með að veita Hollendingum keppni um efsta sætið og ætla sér svo sannarlega upp úr riðlinum.

Norður-Makedónía er lakasta lið keppninnar, samkvæmt heimslistanum, og fór afar auðvelda leið á EM en sýndi með sigrinum á Þýskalandi í mars að ekkert er útilokað. Íslendingar ættu að gefa Norður-Makedóníumönnum gaum því þeir mæta á Laugardalsvöll í haust.

Holland

Hollendingar eru með sterkasta leikmannahópinn í C-riðli þó að vissulega sé áfall fyrir þá að Virgil van Dijk hafi ekki jafnað sig af meiðslum í tæka tíð fyrir mótið. Þessi stórþjóð í fótboltanum mætir svelt til leiks nú eftir hafa horft á eftir sæti á EM 2016 í hendur Íslendinga og einnig misst af HM 2018.

Hollendingar komust auðveldlega áfram úr undankeppninni, undir stjórn Ronalds Koeman, en enduðu þó fyrir neðan Þýskaland í sínum riðli. Liðið tapaði svo fyrir Tyrklandi í fyrsta leik í undankeppni HM í mars og væntingar til þess eru hófstilltar þó að allir geri ráð fyrir að Holland fljúgi upp úr riðlinum.

Frank de Boer tók við af Koeman í september í fyrra þegar sá síðarnefndi tók við Barcelona. De Boer var aðstoðarþjálfari þegar Holland komst í úrslitaleik HM árið 2010 og lék með liðinu þegar það hafnaði í 4. sæti á HM 1998.

Austurríki

Á meðan að Íslendingar hugsa um markið hans Arnórs Ingva Traustasonar í París, á EM 2016, sem eitt af stærstu augnablikum íslenskrar íþróttasögu þá gráta Austurríkismenn það að hafa ekki unnið leikinn. Þeir eru staðráðnir í að gera betur nú og komast í fyrsta sinn upp úr riðlakeppninni.

David Alaba, sem fer frá Bayern til Real Madrid í sumar, mun leiða Austurríkismenn áfram en fleiri þurfa að láta til sín taka eins og Marko Arnautovic, fyrrverandi leikmaður West Ham og Stoke, sem skoraði sex mörk í undankeppni EM.

Undir stjórn Franco Foda, sem tók við Austurríki í lok árs 2017, endaði liðið í 2. sæti í sínum riðli í undankeppni EM, á eftir Póllandi. Austurríki vann meðal annars báða leiki sína við Norður-Makedóníu sem á ný verður andstæðingur liðsins á EM.

Úkraína

Eftir að hafa horft upp á HM-sæti til Íslendinga fyrir þremur árum flugu Úkraínumenn í gegnum undankeppni EM án þess að tapa leik. Liðið endaði fyrir ofan ríkjandi Evrópumeistara Portúgals.

Gamla markamaskínan úr AC Milan (og Chelsea), Andriy Shevchenko, hefur stýrt Úkraínu frá árinu 2016. Hann er með nokkra hágæðaleikmenn í sínum hópi, þar á meðal þrefalda Englandsmeistarann Oleksandr Zinchenko og Andriy Yarmolenko sem farinn er að nálgast markamet þjálfarans en glímir reyndar við óvissu vegna meiðsla.

Þó að ekki megi líta framhjá góðum árangri þegar Úkraína tilheyrði Sovétríkjunum þá hefur úkraínska landsliðið litlum árangri náð og vill bæta úr því. Liðið hefur ekki náð lengra en í riðlakeppni EM og þetta er í fyrsta sinn sem Úkraína kemst á mótið án þess að þurfa að fara í umspil eða fá frípassa sem heimaþjóð.

Norður-Makedónía

Norður-Makedóníumenn verða andstæðingar Íslands í haust í undankeppni HM. Fyrst ætla þeir sér hins vegar að sýna sig og sanna á sínu fyrsta stórmóti og þangað fara þeir fullir sjálfstrausts eftir útisigurinn óvænta á Þýskalandi í mars.

Með gamla brýnið Goran Pandev í broddi fylkingar komst Norður-Makedónía á EM í gegnum umspil. Þar græddi liðið á því að hafa verið í neðstu deild Þjóðadeildarinnar því UEFA ákvað að eitt lið þaðan kæmist á EM. 

Á meðan að Ísland hefði þurft að vinna Rúmeníu og Ungverjaland til að komast úr sínu umspili, þurfti Norður-Makedónía því aðeins að vinna Kósovó og Georgíu. Það verður að teljast auðveldasta leið á EM í sögu keppninnar. Pandev skoraði einmitt eina markið í sigrinum á Georgíu.

Igor Angelovski hefur stýrt Norður-Makedóníu í fimm og hálft ár. Þessi 44 ára Makedóníumaður hafði áður náð góðum árangri með Rabotnicki í deildinni heima, í sínu fyrsta þjálfarastarfi.

Það yrði hálfgert kraftaverk ef Norður-Makedónía kæmist upp úr riðlinum en ekkert er útilokað, sérstaklega ef hinn ungi miðjumaður Napoli, Eljif Elmas, nær að láta ljós sitt skína.

Hvað tekur við?

Tvö efstu liðin í riðlinum eru örugg um sæti í 16-liða úrslitum. Fjögur lið með bestan árangur í 3. sæti, í riðlunum sex, komast einnig í 16-liða úrslitin.

Sigurliðið í C-riðli mætir liðinu í 3. sæti í riðli D, E eða F. 

Liðið í 2. sæti C-riðils mætir sigurliði A-riðils (Ítalía, Tyrkland, Wales, Sviss). 

Ef liðið í 3. sæti C-riðils kemst áfram mætir það sigurliði F-riðils eða sigurliði E-riðils.