Stuðnings­menn Liver­pool kátir eftir nýjasta mynd­band Vans Dijk

Hollendingurinn hefur verið á meiðslalistanum síðan í október en hann meiddist þá illa eftir samstuð við Jordan Pickford í Bítlaborgarslagnum.

Síðar kom í ljós að Van Dijk var með slitið krossband en búist var við því að hann yrði frá út tímabilið. Nýjasta myndband hans gefur hins vegar von um annað.

Hann hefur verið duglegur að birta myndbönd af sér; bæði í ræktinni og úti á vellinum en í nýjasta myndbandinu sést hann hlaupa um AXA æfingasvæði Liverpool.

„Plís komdu og bjargaðu okkur,“ skrifaði einn stuðningsmaðurinn undir myndbandið og annar skrifar: „HANN ER AÐ HLAUPA!“.

Liverpool er úr leik í Meistaradeildinni eftir tap gegn Real Madrid í átta liða úrslitunum en liðið berst nú um Meistaradeildarsæti á Englandi.

Þeir eru nú í sjötta sætinu, fjórum stigum á eftir Chelsea sem er í fjórða sætinu, en Liverpool ferðast til Manchester um helgina þar sem þeir mæta United.