Ódýrast að hlaða rafbílinn á nóttunni

Bergur Ebbi fjallar um þær tækninýjungar sem eru handan við hornið og þær áskoranir sem standa í vegi fyrir innleiðingu þeirra í þáttunum, sem eru unnir af Orkuveitu Reykjavíkur. Þriðji þáttur kemur út í dag en alls verða þeir fjórir.

„Rafmagn á að vera ódýrast á nóttunni og við viljum að rafbílar séu hlaðnir á nóttunni því þá er minnsta álagið í kerfinu og það er lang besta nýtingin í því,“ segir Bjarni. Í þættinum ræða þeir Bergur Ebbi meðal annars um innleiðingu snjallmæla hjá Veitum, eins af dótturfyrirtækjum OR.

Skipta út 160 þúsund mælum

Veitur undirrituðu samninginn í lok síðasta árs og mun innleiðing snjallmælanna hefjast á þessu ári - en skipta þarf út um 160 þúsund mælum.

„Þá getum við verið með sífjaraflestur og fylgst nákvæmlega með notkunarmynstri okkar viðskiptavina. Við getum einnig stillt saman verð innan sólarhrings og þannig mælt hvert verðið er á rafmagni á hverjum tíma. Á kvikum markaði, sem er það sem við stefnum að, þá getum við sveiflað verði,“ segir Bjarni.

Rafmagnsverð í dag er óháð álagi í kerfinu og er því breytt árlega. Bjarni tekur dæmi um rafmagnsbíl sem er með 100 kw rafgeymi.

„Þá segir þú við bílinn þinn að kvöldi að hann skuli fullhlaða sig yfir nóttina ef verðið fer niður fyrir eitthvað ákveðið og ef það hækkar um eitthvað ákveðið skuli hann hætta að hlaða.“

Og Bjarni segir að með þessum hætti megi jafnvel græða peninga á rafmagnsbílnum þegar eigandinn er í fasta svefni.

„Því þú stýrir því auðvitað hvernig bíllinn hegðar sér og getur sagt honum að setja allt rafmagn sem hann er með í rafgeyminum inn á kerfið ef verðið er að hækka, en þó ekki það mikið að þú komist til vinnu daginn eftir. Svo þegar þú kemur þangað þá stingurðu auðvitað í samband þar.“

Hér fyrir ofan er styttri útgáfa af þættinum en hægt er að sjá hann í fullri lengd á YouTube-rás Orkuveitunnar.