„Þessi pása gerði ÍBV gott“

Þetta segir handboltasérfræðingurinn Þorgerður Anna Atladóttir nú þegar sólarhringur er í að keppni í Olís-deild kvenna hefjist að nýju eftir yfir 100 daga hlé vegna kórónuveirufaraldursins.

Aðeins tókst að spila þrjár umferðir í haust og síðan þá hefur ekki verið hægt að sjá liðin spila. Þorgerður segir því erfitt að rýna í stöðuna en málin gætu skýrst strax á morgun með stórleikjum Fram og ÍBV, og Vals og Stjörnunnar.

Leikir í 4. umferð laugardaginn 16. janúar:

„Þau eru svo jöfn þessi fjögur lið. Það er því rosalega erfitt að segja til um það núna hvaða lið muni landa titlinum. Ég myndi setja peninginn minn á Fram eða ÍBV, en þetta er auðvitað skrýtin staða því maður hefur ekki séð neitt til liðanna í yfir 100 daga. Það er margt búið að gerast í þessari pásu og hún gerði eflaust sumum liðum gott en öðrum ekki,“ segir Þorgerður Anna sem verður í Seinni bylgjunni á Stöð 2 Sport í kvöld þar sem hitað verður rækilega upp fyrir hið nýja upphaf í deildinni.

Eyjakonur samstilltar eftir hléið

ÍBV er efst í deildinni eftir umferðirnar þrjár í haust, með fimm stig, en liðið vann sigra á Val og HK og gerði jafntefli við KA/Þór.

„Birna Berg og Hrafnhildur Hanna náðu sér ekkert á strik í þessum þremur leikjum í haust. Það er skiljanlegt, því þær voru bara að koma aftur í deildina, en nú hafa þær haft tíma til að venjast aðstæðum og æfa með nýju liði. Þessi pása gerði ÍBV nokkuð gott, því Ester Óskarsdóttir fékk líka tíma til að koma til baka eftir barnsburð. Ég hef trú á að Eyjakonur komi sterkar og samstilltar til leiks,“ sagði Þorgerður.

Karen Knútsdóttir er komin á ný inn í lið Fram eftir að hafa fætt sitt fyrsta barn en Perla Ruth Albertsdóttir er hins vegar ólétt. Stella Sigurðardóttir er svo óvænt komin inn í hópinn hjá Fram:

„Það verður mjög gaman að fylgjast með Stellu en maður veit ekkert hvað verður og hvernig Stebbi [Stefán Arnarson] hugsar þetta. En mér finnst líklegt að hann geti notað hana fljótlega í vörn, og það er þá mikill styrkur fyrir Fram. Hún mun 100 prósent styrkja Framliðið.“

Valsliðið mjög sterkt en þarf tíma

Valur og Stjarnan koma þétt á eftir Fram og ÍBV í huga Þorgerður en Valskonur þurfa þó að glíma við skakkaföll:

„Þær eru að missa Örnu, sem var þó ekki búin að spila mjög mikið heldur, og missa líka Hildi Björnsdóttur sem var líka mikilvæg í vörninni. Það eru því stórir hlekkir farnir úr vörninni en þær fá Theu og Sigrúnu sem er línumaður. Valur er náttúrulega með Þóreyju í skyttunni fyrir utan hægra megin, og það er líka spurning hvort Thea sé tilbúin vegna meiðsla. Valsliðið er mjög sterkt en mín tilfinning er að liðið þurfi meiri tíma til að fínpússa sig heldur en til dæmis ÍBV,“ segir Þorgerður.

Martha og Vala stjórnað sóknarleiknum frá A til Ö

KA/Þór þarf að spjara sig án Mörthu Hermannsdóttur vegna meiðsla í hæl og hjá HK er Valgerður Ýr Þorsteinsdóttir ólétt:

„Þetta eru stórir póstar sem að detta út. Í raun er það þannig að Martha og Vala hafa stjórnað sóknarleik sinna liða frá A til Ö, og gert það mjög vel. Það kemur alltaf maður í manns stað en þetta mun taka tíma fyrir þessi lið. Þess vegna setur maður þau fyrir neðan þessi efstu fjögur,“ segir Þorgerður.

Flestir virðast áfram sammála um það að FH og Haukar verði tvö saman í fallbaráttunni:

„Það sem að gæti gert þetta skemmtilegt er að þetta eru tvö Hafnarfjarðarlið og vonandi verða leikir þeirra bara spennandi. FH er búið að fá Ragnheiði Tómasdóttur en breiddin hefur minnkað hjá Haukum með brotthvarfi Þórhildar Brögu. Þær máttu illa við því. Svo eru þær bara með einn markvörð og spurning hvað Haukarnir gera við því, því það er mikilvægt líka upp á æfingar að hafa tvo góða markverði.“