Tólf smit staðfest á meginlandi Kína í gær

Tólf ný smit voru staðfest á meginlandi Kína í gær samanborið við sextán á laugardag. Engin dauðsföll voru skráð vegna kórónuveirunnar sem veldur Covid-19 í landinu í gær samkvæmt heilbrigðisyfirvöldum þar í landi.

Átta af tólf smitum sem greindust í gær voru innflutt og fjögur sem smituðust innanlands. Þrjú þeirra sem smituðust innanlands voru í Heilongjiang-héraði, nyrsta héraði Kína. Í daglegu upplýsingabréfi heilbrigðisyfirvalda segir jafnframt að 49 til viðbótar væru nú einkennalausir eftir smit.

Á vef Reuters kemur fram að alls hafi hátt í 83 þúsund smit verið staðfest á meginlandi Kína og 4.632 látist.