Rauðar tölur í Kauphöllinni við opnun markaða

Íslenska úrvalsvísitalan hefur þegar lækkað um sex prósent eftir að opnað var fyrir viðskipti með bréf í íslensku Kauphöllinni í morgun. Hlutabréf í Icelandair hafa lækkað um tæp 14 prósent en aðeins hafa verið viðskipti fyrir átta milljónir króna þegar þetta er skrifað.

Hlutabréf í Iceland Seafood hafa lækkað um tæp tólf prósent og bréf í Skeljungi um tæp ellefu. Bréf í Arion banka hafa lækkað um sjö prósent eins og hjá Origo, Reginn, TM og VÍS.

Hrun er í kauphöllum um allan heim það sem af er degi. F.T.S.E. vísitalan sem reiknuð er af hundrað verðmætustu fyrirtækjunum í London lækkaði um rúm sex prósent í morgun. Þýska Dax-vísitalan hefur lækkað um yfir sjö prósent og Nikkei vísitalan í Japan um á þriðja prósent.

Þá hefur vísitalan í Ástralíu fallið um tæp tíu prósent.