Um fimm hundruð dráttar­­vélum ekið inn í mið­­borg Kaup­manna­hafnar

Um fimm hundruð dráttarvélum var keyrt inn í miðborg Kaupmannahafnar í morgun þar sem aðgerðum dönsku ríkisstjórnarinnar vegna kórónuveirusmita á minkabúum var mótmælt.

Nú þegar er búið að lóga níu milljónum af um sautján milljónum minkum landsins, en til stendur að lóga þeim öllum. Er það gert til að koma í veg fyrir að kórónuveiran breiðist enn frekar út í landinu, en í haust bárust fréttir af því að stökkbreytt afbrigði kórónuveirunnar hafi fundist á fjölda minkabúa í Danmörku og hafði veiran borist í fólk.

Bændurnir á dráttarvélunum fengu lögreglufylgd í dönsku höfuðborginni þar sem stefnan var sett á hafnarsvæðið Langalínu. Bændur mótmæltu sömuleiðis í Árósum.

Hluti dráttarvélanna í Kaupmannahöfn hafði verið ekið um langan spöl og komu nokkrir þeirra yfir brúna á Stóra-Belti milli Sjálands og Fjóns í nótt og í morgun.