Cummings hyggst hætta fyrir árs­lok

Dominic Cummings mun láta af störfum sem helsti ráðgjafi breska forsætisráðherrans Boris Johnson fyrir árslok. Mikil átök hafa verið í stjórnarliði Johnsons síðustu vikurnar og er talið að afsögnin muni draga eitthvað úr áhrifum Brexit-harðlínumanna innan breska stjórnarheimilisins.

BBC hefur eftir Cummings að orðrómur um að hann hafi nýverið hótað því að hætta væru hugarburður einn, en að fyrirætlanir sínar, sem hann tíundaði í bloggfærslu frá í janúar síðastliðinn, um að hann vonaðist til að láta af störfum fyrir árslok 2020 ættu enn við.

Cummings er talinn hafa verið einn helsti skipuleggjandi Brexit-herferðarinnar og er sömuleiðis talinn hafa stuðlað að miklum kosningasigri Johnsons á síðasta ári.

Greint var frá því í gær að Lee Cain, samskiptastjóri Johnsons, annar harður Brexit-sinni og náinn starfsmaður Cummings, væri hættur störfum.