Kallar eftir auknum stuðningi ríkisins við sveitar­fé­lög

Heiða Björg Hilmisdóttir, sem var í gær endurkjörin varaformaður Samfylkingarinnar með 60% greiddra atkvæða, segir ljóst að ríkið þurfi að verja sveitarfélögin núna á tímum kórónuveirunnar. Sveitarfélögin séu mjög tengd því hvernig atvinnuástandið er í landinu og það gangi ekki að sveitarfélögin taki lán fyrir rekstri sínum.

Heiða Björg var gestur Víglínunnar í dag en hún ræddi þar stöðu sveitarfélaganna. Heiða er borgarfulltrúi fyrir Samfylkinguna og einnig varaformaður Sambands íslenskra sveitarfélaga.

„Ég held að það sé alveg ljóst að ríkið, okkar sameiginlegi stóri sjóður, þarf að verja sveitarfélögin núna. Sveitarfélögin eru mjög tengd því hvernig atvinnuástandið er í landinu, okkar tekjur eru útsvarið og þegar það kemur svona skyndilegt atvinnuleysi, sem við höfum bara aldrei séð áður á Íslandi, þessi staða eins og hún er uppi núna að einn af hverjum tíu sem vilja vinna fái ekki vinnu, þá er þetta mjög alvarlegt,“ sagði Heiða.

Ríkisstjórnin verði að styðja sveitarfélögin

Hún segir þetta gríðarlega mikilvægt, en sveitarfélögin þurfi nú að veita aukna þjónustu.

„Við þurfum að veita meiri fjárhagsaðstoð, við þurfum að veita fleiri börnum mat í skólum og stuðning til frístunda og annað sem er bara gríðarlega mikilvægt fyrir íslenskt samfélag. Þannig að ég held að það sé alveg ljóst að ríkisstjórnin þarf að taka ákvörðun um það að styðja sveitarfélögin í gegn um þetta,“ segir Heiða Björg.

Þetta sé mikilvæg nærþjónusta sem samfélagið geti ekki verið án. Hún segir ríkisstjórnina hafa í sjálfu sér lofað því að hún ætli að standa með sveitarfélögum í gegn um kórónuveirukreppuna. Þar sé Reykjavíkurborg ekki undanskilin.

Sveitarfélög enn að súpa seyðið af mistökum sem gerð voru eftir Hrun

Sigurður Ingi Jóhannsson, samgöngu- og sveitarstjórnaráðherra, hefur hvatt þau sveitarfélög sem eru í nógu góðri stöðu til þess að taka lán að auka lántöku sína. Heiða segir það þó ekki góða hugmynd, að sveitarfélögin fari að taka lán til þess að sinna rekstri sínum. Það hafi verið gert í Hruninu og sveitarfélögin séu enn að súpa seyðið af þeim mistökum.

„Reykjavík gæti alveg tekið hagstæð lán og er að taka hagstæð lán en sveitarfélag sem tekur lán fyrir rekstri sínum er ekki mjög sjálfbært sveitarfélag. Og í rauninni höfum við ekki gert það og ekki mátt það. Sveitarfélög eiga bara að reka sig á þeim tekjum sem þau fá. Hins vegar höfum við að sjálfsögðu verið að taka lán fyrir fjárfestingum og fjárfestingar sveitarfélaga eru grunnskólar, skólar, götur, allt það sem gerir samfélagið okkar að samfélagi,“ segir Heiða.

Verði þær fjárfestingar stöðvaðar og lánin notuð til reksturs sveitarfélagana verði þessar innviðauppbyggingar ekki að veruleika, en þær þurfi til að ungt fólk vilji búa í sveitarfélögunum.

„Þau fara ekki að búa í einhverju sveitarfélagi þar sem ekki er leikskóli eða almennilegur grunnskóli,“ segir Heiða.

„Við sáum eftir hrunið síðast að þá spöruðu sveitarfélögin, slógu af allar fjárfestingar og við erum í raun bara að vinna upp þá skuld, þessa fjárfestingarskuld sem við vorum komin í við samfélagið. Ég veit að Reykvíkingar voru að básúnast yfir götum, malbiki og alls konar sem var satt af því að þarna var sparað og það sýndi sig að það er ekki gáfulegt.“

Lausnin sé að ríkissjóður taki lán og styrki sameiginlega sjóði fyrir alla landsbúa.

„Til þess að við getum veitt fötluðum mannsæmandi þjónustu, að við getum stutt við eldri borgara sem þurfa það, að við getum stutt börnin og allt þetta atvinnulausa fólk sem er að lifa kannski sína erfiðustu tíma akkúrat núna,“ segir Heiða.