Biden lýsti yfir sigri, lagði áherslu á að sameina þjóðina og sigra Covid

Joe Biden lýsti yfir sigri í bandarísku forsetakosningunum í sigurræðu sem hann hélt fyrir framan fjölmenni í Wilmington í Delaware-ríki Bandaríkjanna í nótt. Í ræðunni lagði hann áherslu að hann yrði forseti allra Bandaríkjamanna, ekki bara þeirra sem kusu hann. Þá sagðist hann strax eftir helgi ætla að hefja vinnu við að finna leiðir til þess að hefta úbreiðslu kórónuveirunnnar með það að markmiði að sigrast á faraldrinum.

Kamala Harris, varaforsetaefni Bidens, kynnti hinn væntanlega forseta til leiks sem nánast hljóp á svið til þess að halda ræðu sínu. Hann hóf leik á því að lýsa yfir sigri.

„Þjóðin hefur talað. Hún færði okkur augljósan sigur, sannfærandi sigur, sigur fyrir okkur, þjóðina,“ sagði Biden sem minnti á að enginn forsetaframbjóðandi í sögu Bandaríkjanna hefði hlotið fleiri atkvæði í forsetakosningum en hann, 74 milljón þegar þetta er skrifað.

Sagðist Biden vera fullur auðmýktar vegna þessa trausts sem bandaríska þjóðin hefði sýnt honum.

„Ég heiti því að vera forseti sem mun ekki sundra, heldur sameina. Forseti sem horfir ekki til rauðra eða blárra ríkja, forseti sem sér aðeins Bandaríkin. Að vera forseti sem mun reyna af öllum mínum mætti að vinna mér inn traust ykkar.“

„Ég sóttist eftir þessu embætti til þess að endurheimta sál Bandaríkjanna. Að endurbyggja uppistöðu þjóðarinnar, miðstéttina. Að vinna aftur til baka virðingarsess Bandaríkjanna á meðal þjóða heimsins, og að sameina okkur hér heima fyrir,“ sagði Biden

Biden talaði einnig beint til stuðningsmanna Donalds Trump, sitjandi forseta Bandaríkjanna, sem enn hefur ekki viðurkennt ósigur.

„Gefum hvert öðru tækifæri,“ sagði Biden. „Það er kominn tími til að leggja til hliðar þessa harkalegu orðræðu, lækkum aðeins hitastigið, hittumst aftur, hlustum á hvert annmað og hættum að koma fram við andstæðinga okkar sem óvini, sagði Biden“ áður en hann hét því að vinna alveg jafn mikið fyrir alla Bandaríkjamenn, hvort sem þeir kusu hann eða ekki.

Þá kom Biden sérstaklega inn á kórónuveirufaraldurinn. Svo virðist sem hann ætli að taka hann föstum tökum.

„Á mánudaginn mun ég skipa hóp leiðandi vísindamanna og sérfræðinga sem ráðgjafa mína við valdaskiptin til þess að taka Biden-Harris aðgerðaráætlunina og breyta henni í áætlun sem hægt er að hefjast handa við þann 20. janúar 2021. Það plan verður byggt á vísindum.“