Þrettánda andlátið hér á landi vegna Covid-19

Einn sjúklingur lést á síðasta sólarhring á Landspítala vegna Covid-19. Frá þessu er greint á vef spítalans. Alls hafa því þrettán manns látist hér á landi vegna sjúkdómsins.

Í tilkynningu spítalans er aðstandendum hins látna vottuð samúð. Á upplýsingafundi almannavarna klukkan 11 kom fram að hinn látni hefði verið á níræðisaldri.

Er þetta annan daginn í röð sem andlát verður á spítalanum vegna Covid-19. Í gær var tilkynnt um andlát einstaklings á níræðisaldri sem hafði verið sjúklingur á Landakoti. Umfangsmikil hópsýking kom þar upp fyrir viku.

Fréttin hefur verið uppfærð.