Börn og starfsmenn á leikskólanum Fífuborg í sóttkví

Fimmtán börn og að minnsta kosti fjórir starfsmenn á Ljósheimadeild í leikskólanum Fífuborg í Grafarvogi verða í sóttkví út vikuna eftir að starfsmaður þar greindist smitaður í gær. Þetta er í annað skipti sem kórónuveirusmit kemur upp á leikskólanum í þessum mánuði.

Helga Sigurðarsdóttir, leikskólastjóri Fífuborgar, staðfestir við Vísi að börnin og starfsfólkið verði í sóttkví út þessa viku. Verið sé að skoða hvort senda þurfi þrjá aðra starfsmenn í sóttkví sem deildu kaffistofu með þeim sem greindist smitaður á föstudag. Smitið hafi átt sér stað utan leikskólans.

Hún segir að tekist hafi að halda góðri hólfun í starfsemi leikskólans þannig að aðrar deildir geta haldið áfram starfsemi þar sem ekki hafi verið gerð krafa um að aðrir færu í úrvinnslusóttkví.

Í tölvupósti til foreldra í morgun segir að hópurinn fari líklega í sýnatöku á föstudag. Foreldrar barnanna þurfa ekki að fara í sóttkví nema annað sé tekið fram.

Smitið nú segir hún ótengt öðrum starfsmanni sem greindist smitaður af veirunni fyrir tveimur vikum. Þá þurftu um þrjátíu börn á aldrinum þriggja til sex ára og níu starfsmenn að fara í sóttkví. Tvær deildir þurftu að fara í úrvinnslusóttkví.

„Þetta er alveg ferlegt. Það er erfitt að halda úti skólastarfi svona,“ segir Helga.