Umfjöllun: Ísland - Rúmenía 2-1 | Gylfi kom Íslandi skrefi nær þriðja stórmótinu í röð

Íslenska karlalandsliðið í fótbolta færðist skrefi nær þriðja stórmótinu í röð með 2-1 sigri á Rúmeníu á Laugardalsvellinum í undanúrslitum umspils fyrir EM 2020 í kvöld. Gylfi Þór Sigurðsson skoraði bæði mörk Íslands í fyrri hálfleik en Alexandru Maxim gerði mark Rúmeníu úr vítaspyrnu um miðjan seinni hálfleik.

Ísland mætir Ungverjalandi í Búdapest í úrslitaleik um sæti á EM 12. nóvember næstkomandi. Ungverjar unnu Búlgara, 1-3, í hinum undanúrslitaleiknum í umspilinu í kvöld.

Ef það var einhver minnsti vafi á því fyrir leik hver besti landsliðsmaður Íslands frá upphafi er, þá eyddi Gylfi honum með frammistöðu sinni í kvöld.

Hafnfirðingurinn var besti maðurinn á vellinum og gerði gæfumuninn eins og hann hefur gert svo oft fyrir íslenska landsliðið undanfarin ár.

Veðjaði á reynsluna

Erik Hamrén gat loksins valið úr öllum okkar bestu leikmönnum síðan hann tók við landsliðinu fyrir tveimur árum og stillti upp reynslumiklu byrjunarliði. Sjö af ellefu sem byrjuðu leikinn voru í byrjunarliðinu í öllum leikjunum á EM 2016. Helsta sem kom á óvart var að Arnór Ingvi Traustason var á vinstri kantinum en annað var hefðbundið.

Gamla bandið brást ekki frekar en fyrri daginn. Íslendingar voru heilt yfir sterkari í leiknum og spiluðu af skynsemi og öryggi. Íslenska liðið er mun reynslumeira en það rúmenska og það sást í leiknum í kvöld.

Eftir ágæta byrjun Rúmena náðu Íslendingar forystunni á 16. mínútu. Jóhann Berg Guðmundsson fékk boltann við hægra vítateigshornið, sendi á Gylfa sem dansaði aðeins með boltann og setti hann svo með vinstri fótar skoti í nærhornið. Gylfi setti boltann milli fóta Alexandru Cretu og Ciprian Tatarusanu sá boltann seint og var varnarlaus í marki Rúmeníu.

Á 27. mínútu skoraði Alfreð Finnbogason eftir stungusendingu Gylfa en markið var dæmt af með hjálp VAR.

Vinstri gullfóturinn

Íslensku strákarnir létu það ekki á sig fá og á 34. mínútu komust þeir í 2-0. Jóhann Berg sendi á Alfreð sem skilaði boltanum í fyrsta á Gylfa sem var rétt innan vítateigs hægra megin. Hann tók boltann niður með bringunni og lagði hann svo smekklega í fjærhornið. Aftur notaði Gylfi vinstri fótinn með frábærum árangri. Hann hefur nú skorað 24 mörk fyrir íslenska landsliðið, tveimur færra en Kolbeinn Sigþórsson og Eiður Smári Guðjohnsen.

Rúmenar voru meira með boltann í fyrri hálfleik en ógnuðu lítið sem ekkert og áttu ekki skot á íslenska markið. Staðan í hálfleik var 2-0, Íslendingum í vil.

Sjá einnig: Mörk Gylfa með baneitruðum vinstri fæti má sjá hér

Mirel Radoi, þjálfari Rúmeníu, freistaði þess að hleypa nýju lífi í leik sinna manna með því að gera þrefalda skiptingu í hálfleik. Ianis Hagi, Gabriel Iancu og George Puscas komu inn á fyrir Alexandru Mitrita, Caiprian Deac og Denis Alibec.

Íslendingar byrjuðu seinni hálfleikinn betur og á 50. mínútu átti Kári Árnason skalla framhjá eftir hornspyrnu Gylfa.

Á 58. mínútu átti Guðlaugur Victor Pálsson svakalegan sprett fram völlinn eftir aukaspyrnu Rúmena. Hann sendi boltann inn fyrir vörn Rúmeníu á Arnór Ingva sem komst í dauðafæri en Tatarusanu varði vel.

Líflínan

Eftir færið skokkaði Damir Skomina, dómari leiksins, út að hliðarlínu til að skoða atvik sem gerðist í vítateignum í aukaspyrnunni. Og eftir að langa yfirlegu dæmdi hann vítaspyrnu á Ragnar Sigurðsson fyrir brot á Andrei Burca. Umdeildur dómur svo ekki sé fastar að orði kveðið. Maxim fór á punktinn, skoraði af öryggi og minnkaði muninn í 2-1.

Rúmenar höfðu ekki gert sig líklega til að skora fram að vítinu og voru ekki líklegir til að skora eftir það. Þeir héldu boltanum ágætlega voru frekar bitlausir og ollu íslensku vörninni litlum vandræðum. Skot Maxims úr vítinu var eina skot Rúmeníu á markið í leiknum.

Á 80. mínútu vildu Rúmenar fá vítaspyrnu eftir að boltinn fór í hönd Ragnars en að þessu sinni dæmdi Skomina ekki neitt. Tilefnið var þó meira en þegar hann dæmdi vítaspyrnuna 20 mínútum áður.

Íslendingar stóðust annars allar sóknir Rúmena og lönduðu sigrinum. Framundan er því úrslitaleikur um sæti á EM eftir rúman mánuð. 

Þessi hópur hefur skrifað marga af glæsilegustu köflunum í íslenskri fótboltasögu og ætlar að bæta enn einum við á ungverskri grundu 12. nóvember.