Aston Villa að kaupa sóknarmann frá Lyon

Aston Villa var eitt þeirra félaga sem var ekki að spila um helgina í ensku úrvalsdeildinni en það hefur verið nóg að gera á skrifstofu félagsins engu að síður.

Félagið er að ganga frá kaupum á argentínska markverðinum Emiliano Martinez frá Arsenal og þá er sóknarmaðurinn Bertrand Traore við það að ganga í raðir félagsins frá Lyon.

Samkvæmt heimildum SkySports hefur Lyon samþykkt tilboð upp á 17 milljónir punda og mun Traore gangast undir læknisskoðun í Birmingham borg í dag.

Traore er 25 ára gamall sóknarmaður sem var á mála hjá Chelsea á sínum yngri árum en hann skoraði aðeins eitt mark í 23 leikjum fyrir Lyon í Ligue 1 á síðustu leiktíð.