„Hægt að koma í veg fyrir fjögur af tíu krabbameinum með lífsstíl“

Það er magnað hversu mikil áhrif við getum haft á líf okkar og heilsu með mataræði og heilbrigðum lífsstíl, segja Jóhanna Torfadóttir næringarfræðingur og Elín Skúladóttir formaður Krafts. Þær ræddu mikilvægi holls mataræðis í nýjasta þætti Krafts hlaðvarpsins Fokk ég er með krabbamein.

Í þættinum Er tenging á milli krabbameins og mataræðis? fara þær meðal annars yfir það sem allir geta gert til þess að reyna að draga úr líkum á því að fá krabbamein. Þær segja að mataræði á unglingsárum skipti þar máli og því eigi að byrja að skapa góðar venjur strax í æsku. Áhrifin sem hreyfing, mataræði og streita geta á heilsuna eru töluverð.

Hægt að bjarga mörgum

„Við vitum og við vitum að þetta eru varlega áætlaðar tölur, að það sé hægt að koma í veg fyrir fjögur af tíu krabbameinum með lífsstíl. Þetta er tala sem flestir eru orðnir nokkuð sammála um en stundum er sagt að 30 til 50 prósent krabbameinstilfella væri hægt að koma í veg fyrir með breyttum lífsstíl. Þannig að það er til mikils að vinna,“ segir Jóhanna.

Þær segja að það sé auðvitað erfitt að vita ekki áhrif eða útbreiðslu forvarnanna en það sé þó alltaf jákvætt fyrir fjöldann, að bera út þennan boðskap.

„Þetta er samt svo súrt því það er mikið af fólki sem hægt er að bæði sleppa þessari lífsreynslu og einnig bjarga lífi margra,“ bætir Elín við. Sjálf segist hún hafa verið á sínu óhollasta tímabili á unglingsárunum, sem hugsanlega hafði einhver áhrif á hennar heilsufar.

Þakklát fyrir breytingarnar

Elín breytti mataræðinu í kjölfarið af því að hún var greind með brjóstakrabbamein. Hún gerðist grænkeri og tók alla fjölskylduna með sér í þá breytingu, með misgóðum undirtektum heimilismanna.

„Það kom mér á óvart hvað ég var hraust í lyfjameðferðinni, eiginlega hressari en ég hafði verið áður“ segir Elín meðal annars í þættinum.

„Þetta hefur breytt alveg ótrúlega miklu fyrir mig varðandi mína heilsu og mína endurhæfingu eftir meðferðina. Ég er ótrúlega þakklát fyrir að hafa gert þessar breytingar og þetta hefur reynst mér og fjölskyldu minni alveg ótrúlega vel.“

Viðtal Sigríðar Þóru Ásgeirsdóttur við þær Elínu Skúladóttur og Jóhönnu Torfadóttir má heyra í heild sinni í spilaranum hér fyrir neðan en þátturinn er einnig kominn á allar helstu efnisveitur.