Trump hunsaði orsakir ófriðarins í heimsókn til Kenosha

Donald Trump Bandaríkjaforseti minntist ekkert á atvikið þegar lögreglumaður skaut og særði svartan mann sem varð kveikjan að ófriði sem hefur ríkt í Kenosha í Wisconsin undanfarna daga þegar hann heimsótti borgina í dag. Þess í stað lýsti forsetinn óeirðum í borginni sem „innanlandshryðjuverkastarfsemi“ og fór rangt með það sem þar hefur gerst.

Til átaka hefur komið í Kenosha í kringum mótmæli eftir að lögreglumaður skaut Jacob Blake sjö sinnum í bakið sunnudaginn 23. ágúst. Blake liggur alvarlega særður á sjúkrahúsi, lamaður fyrir neðan mitti. Atvikið var sem olía á eldinn í kjölfar dráps lögreglu í Minnesota á George Floyd í maí en það hratt af stað mikilli mótmælaöldu gegn lögregluofbeldi og kerfislægri kynþáttahyggju sem geisar ennþá í sumum borgum.

Eldar voru kveiktir í borginni fyrstu daga mótmælanna og eignarskemmdir voru framdar sem eru taldar hlaupa á hundruð milljónum króna. Ófriðurinn náði hámarki sínu þegar sautján ára gamall piltur úr hópi vopnaðra sjálfskipaðra lögreglumanna skaut tvo mótmælendur til bana og særði þann þriðja í síðustu viku. Ástandið hefur róast verulega síðan þá.

Trump heimsótti Kenosha í dag þvert á vilja borgar- og ríkisyfirvalda sem óttuðust að forsetinn ýfði upp ófriðaröldur á nýjan leik. Ræddi Trump við fyrirtækjaeigendur sem hafa orðið fyrir tjóni í mótmælunum og reyndi að kenna demókrötum um ástandið.

„Þetta eru ekki gjörðir friðsamra mótmælenda heldur í raun og veru innanlandshryðjuverk,“ sagði Trump og skammaði borgarstjóra og ríkisstjóra úr röðum demókrata fyrir að vilja ekki þiggja aðstoð alríkisstjórnarinnar til þess að kveða niður mótmæli og óeirðir.

Telur ofbeldi lögreglu gegn svörtum ekki kerfislægt

Forsetinn minntist ekki á að upphaf ólgunnar í Kenosha hefði verið enn eitt atvikið þar sem lögreglumenn skjóta blökkumann. Hann bauð fram aðstoð alríkisstjórnarinnar við að byggja upp borgina. Upplýsti forsetinn að hann hefði reynt að hafa samband við móður Blake en kosið að ræða ekki við hana þegar fjölskyldan setti fram þá kröfu að lögmaður hlýddi á samtalið.

Á viðburði í Kenosha neitaði Trump því að kerfislæg kynþáttahyggja sé til staðar hjá lögregluliði Bandaríkjanna. Viðurkenndi hann að einhver „rotin epli“ væru í lögreglunni og stundum gerðist „eitthvað“.

„Þeir kalla það að klikka [e. choking] og það gerist,“ sagði Trump sem hefur ítrekað líkt lögreglumönnum sem beita óhóflegu ofbeldi við kylfing sem klikkar á höggi undanfarna daga.

Fordæmdi ekki piltinn sem drap mótmælendur

Trump, sem hefur átt undir högg að sækja gegn Joe Biden, frambjóðanda demókrata, í skoðanakönnunum um nokkurra mánaðaskeið, hefur freistað þess að gera mótmælin og óeirðir að miðpunkti kosningabaráttunnar fyrir kosningarnar sem fara fram í nóvember. Hefur hann stillt sjálfum sér upp sem frambjóðanda „laga og reglu“ og sakað Biden ranglega um að vera handbendi róttækra vinstrimanna og stjórnleysingja.

Biden hefur fordæmt ofbeldisfull mótmæli og skorað á Trump að gera það sama. Í heimsókninni til Kenosha fór Trump hins vegar frjálslega með sannleikann um atburðina þar, þar á meðal um unga manninn sem skaut mótmælendur til bana. Sá mætti á mótmælin til að andæfa þeim sem kröfðust jafnréttis kynþátta og er grunaður um ólöglegan vopnaburð og manndráp.

Þannig veik Trump sér undan því að fordæma drápin og lýsti þeim á allt annan hátt en yfirvöld sem ákærðu piltinn fyrir manndráp. Gaf forsetinn í skyn að pilturinn hefði hrasað á flótta undan mótmælendunum sem hafi ráðist á hann. Pilturinn hefði „líklega verið drepinn“.

AP-fréttastofan segir þessa lýsingu ranga. Pilturinn hefði þegar skotið mótmælanda til bana áður en hann tók til fótanna og féll. Í ákæru saksóknara kemur fram að pilturinn skaut mótmælanda sem reyndi að taka skotvopn af honum. Hópur fólks reyndi að stöðva hann þegar hann flúði og hrópaði að hann hefði skotið mann.

Pilturinn skaut annan mótmælanda til bana þegar hann reyndi að rífa byssuna af honum. Þriðji maðurinn særðist af byssuskoti piltsins.